Emri i rep artistit Betim Januzi, në skenë “Buta” u lakua jashtëzakonisht shumë në media sot. Kjo pasi vëllau i tij, Qendrim Januzi natën e 28 majit  dyshohet se qëlloi për vdekje G.H, të njohur si “Strella”.

Pavarësisht që të rinjtë fascinohen pas këngëve të reperit, jo rallë ai përmes vargjeve flet edhe për kërcënime e vrasje.

I njohur për stilin “fresstyle”, reperi shpesh ka fyer e kërcënuar artist të ndryshëm në tekstet e tij.

Në një video duke kënduar pikërisht në atë stil, ai dëgjohet duke thënë “ki mu therre, ja mu plagos, nuk ki pshtim”.

Gjithashtu, artisti thotë në këtë freestyle se “shooter-i mun me gju e mos me u arrestu”, kështu sipas burimeve të Insajderit, ishte pikërisht Strella i cili dikur thirrej si shooter i Butës.

Hyseni pas një konflikti me “ekipin” e Butës kaloi në rrethin e ngushtë të rep artistit Fero.

Më pas, Buta përmes një freestyle të vitit 2018, e tregon periudhën kur vëllaun e kishte në burg.

Ai tutje, në të njëjtin freestyle elaboron në situatën me vëllain e tij që së fundmi dyshohet se kreu vrasjen, duke thënë:

“Vëllaun mshelë, gjyqi ia pat dhonë 3 vjet, thojke burgu o për burra, që vjen puna shkojmë apet”.

Por kjo nuk është hera e parë që ai kishte folur për të kaluarën kriminale të vëllait të vet ku, përveç intervistave, ai përmes rreshtave artistik kishte aluduar në korruptimin e prokurorit për të liruar vëllain nga burgu, ku kishte përfunduar për tentim-vrasje dhe armëmbajtje pa leje.

“Unë kom rrejt n’gjyq, pa mu dridh asni qerpik, prokurorit ni bakshish, vëllau m’dul mu për ni ditë”, vargje të cilat ai i këndon në një sesion radioje për “SRF”.