Sot është raportuar për përleshjen mes reperit Fero dhe producentit Jetmir Agaj.

Sipas raportimeve, Feronit Shabani i njohur si Fero, bashkë me truprojën e tij, Bujar Ibishi, dyshohet se e kanë sulmuar producentin dhe menaxherin, Jetmir Agaj, në studion e tij në Dragodan të Prishtinës.

Për këtë çështje, Sinjali ka kontaktuar me Prokurorinë Themelore në Prishtinë, të cilët kanë thënë që janë të njoftuar për incidentin e sotëm.

Në një përgjigje nga kjo prokurori kanë konfirmuar që dy persona janë në arrati. Pra bëhet fjalë për Feron dhe truprojën e tij.

“Ju njoftojmë se, prokurori kujdestar nga Departamenti i Krimeve të Rënda, është njoftuar për incidentin në fjalë nga Policia e Kosovës, me ç’rast nga ky incident ka pësuar lëndime trupore një person. Dy persona të dyshuar të përfshirë në këtë rast ndodhen në arrati, derisa prokurori i shtetit në koordinim me policinë janë duke i ndërmarrë të gjitha veprimet e nevojshme hetimore për sqarimin e plotë të këtij rasti”, thuhet në përgjigjen e prokurorisë.

Kujtojmë që Agaj është producent i këngëtarëve të njohur si Azet, Albi e Bardhi.