Balla i kujton Berishës aferën e CEZ: I kushtoi shtetit 414 milionë euro dëm

Kryetari i Grupit Parlamentar të Partisë Socialiste Taulant Balla ka reaguar sërish pas vendimit të DASH, i cili shpalli “non-grata” ish-kryeministrin Sali Berisha.


Përmes një videoje të postuar në rrjetin social facebook, Balla risjell në vëmendje aferën e CEZ, ku thekson se është dosja më korruptive për Shqipërinë në këto 30 vite.

Sipas numrit dy të PS, Taulant Balla veprimet e Sali Berishës i kushtuan 414 milionë euro dëme shtetit shqiptar, teksa ka paralajmëruar se kjo çështje nuk mund të mbyllet këtu.

Ai thekson gjithashtu se duhet të hetohen me urgjencë personat e përfshirë në këtë aferë, duke nisur nga Berisha.

Postimi i plotë i Taulant Ballës:

“Kush kishte të drejtë?!

36 përballje gjyqësore me berishët për aferat korruptive të Saliut, familjes dhe aleatëve të tij. 36 padi për “shpifje” të ngritura nga berishët ndaj meje.

Po kujtoj sot aferën CEZ, dosja më korruptive për Shqipërinë në këto 30 vite. Veprimet e Berishës&co i kushtuan 414 milionë euro dëme shtetit shqiptar.

Kjo dosje duhet rihapur me urgjencë. Personat e përfshirë në këtë aferë duhet të hetohen duke filluar me Sali Berishën”, shkruan Balla.