Nishani: Basha të pranojë rezultatin dhe të japë kontribut në PD duke i hapur rrugën një projekti të ri

Ish-presidenti dhe Kryetari i Këshillit Kombëtar të Partisë Demokratike, Bujar Nishani i ftuar në emisionin “Përballë” ka përsëritur thirrjen drejtuar kreut të PD, Lulzim Basha për t’u dorëhequr dhe për t’i hapur rrugë ndërtimit të një projekti të ri që do të mund të fitojë mbi Edi Ramën.


Nishani e ka cilësuar Bashën një “humbës të përsëritur” që nuk ka arritur të garantojë fitoren dhe fajëson procesin po ashtu si në vitin 2017.

“Duhet marrë përsipër humbja. Kjo është një kulturë për të cilët duhet të kultivojmë veten tonë dhe pastaj kur të jemi përballë të tjerëve do të veprojmë me të njëjtin standard. Pati një qëndrim nga Basha i cili refuzoi të merrte përgjegjësinë politike, konstatoi se ishin humbur zgjedhjet. Në momentin kur Basha doli dhe konfirmoi humbjen dhe nuk mori asnjë përgjegjësi por nënvizoi faktin se do të vazhdonte të mbante të njëjtin temp dhe model. Atëherë është detyra e kujtdo në PD për të vënë alarmin pasi rrezikojmë të mbetemi pa alternativë qeverisëse. Mund të kesh opozitë formale por nuk ke alternativë qeverisëse

Nuk kemi asnjëherë tjetër rast kur humbësi është i përsëritur. Humbi në 2015. Humbi në garën e parë elektorale politike në 2017. U thanë të njëjtat gjëra si sot që na i kanë vjedhur. U dha garanci se këto nuk do ndodhi më. Në vitin 2019 nuk u hy në garë për të shmangur një humbje të dorëzuar në tavolinë. Në rastin e katërt humbje politike me të njëjtat argumente dhe shfajësime.

Problemi është se duhet të ketë një projekt që ta mundë Edi Ramën dhe jo ta ndryshojë atë. Mendoj që në 8 vite Basha nuk arriti të përmbushte projektet e tij për të rrëzuar Ramën. Nuk do arrijë as në 18 vite. Basha duhet të japë ndihmesën që në PD të nisë një projekt i ri. Kjo vjen kur kryetari merr përgjegjësinë politik”- ka thënë mes të tjerash Nishani për gazetarin Lutfi Dervishi.