Armando Broja ishte lojtari i përzgjedhur për konferencën e sotme për shtyp, në prag të ndeshjes së radhës së Chelseat në Ligën e Kampionëve, që e zhvillon nesër kundër Dinamo Zagrebit.

Kishte pyetje për të se si po përshtatej si një opsion nga banka rezervë te “Blutë”, teksa sulmuesi shqiptar këmbënguli se kjo është e gjitha pjesë e procesit të zhvillimit.

Ai vuri në dukje se qëllimi i tij është të përmirësohet dhe se nuk ka shumë vende më të mira për ta bërë këtë sesa në klubin e tij të fëmijërisë.

“Unë e shoh atë si një mundësi masive për mua dhe familjen time. Ky është klubi im i fëmijërisë. Më pëlqen të luaj për Chelsean, është një hap i madh nga vendi ku isha sezonin e kaluar për të ku jam tani”, deklaroi Broja.

Reprezentuesi i Shqipërisë ishte i lidhur me shumë klube në afatin kalimtar të verës, por ai vendosi të mbetet në “Stamford Bridge” për të luftuar për një vend në formacionin bazë.

21-vjeçari po merr më shumë minuta pas ardhjes së Graham Potter. Ai është paraqitur në 14 ndeshje deri më tani (në Premierligë dhe Ligën e Kampionëve), duke regjistruar në total 272 minuta – teksa ka shënuar një gol.

Armando Broja në shtator të këtij viti e zgjati kontratën e tij me Chelsean, e cila është e vlefshme deri më 30 qershor 2028.