Kombëtarja e Kosovës i ka aranzhuar tri ndeshje miqësore, dy për muajin mars dhe një për muajin qershor, njofton Federata e Futbollit të Kosovës.

Fillimisht më 22 mars, Dardanët do të luajnë kundër Armenisë në Yerevan, derisa më pas më 26 mars do të përballen me Hungarinë, në Budapest.

Ndërkaq, testin e radhës, Kosova do ta ketë më 5 qershor, ku do të luajë kundër Norvegjisë, në Oslo.
Federata e Futbollit e Kosovës është në bisedime për aranzhimin edhe të miqësores së dytë për qershor dhe shumë shpejt do të konfirmohet edhe kundërshtari tjetër.

Këto miqësore do të shërbejnë që ekipi dardan të përgatitet sa më mirë për ndeshjet zyrtare në vjeshtë në kuadër të Ligës së Kombeve.

Vlen të përmendet se të trija këto miqësore Kosova do t’i zhvillojë në udhëtim pasi stadiumi “Fadil Vokrri” ende nuk është në dispozicion, derisa FFK-ja ka njoftuar se do të ndërrohet komplet bari i fushës, për t’u vendosur fusha me bar hibrid, por që ende nuk ka nisur kjo lëvizje.

Kosova e kaloi një kampanjë dëshpëruese në kualifikimet e Euro 2024, ndërsa do ta kërkojë këndelljen këtë vit, derisa ende nuk e angazhuar selektorin e ri.

Pjesën e parë të vitit “Dardanët” do ta kalojnë me ndeshje miqësore, ndërsa nga shtatorit do ta nisin kampanjën e Ligës së Kombeve, me ç’rast do t’i mësojnë kundërshtarët e kësaj gare pasnesër, më 8 shkurt pas hedhjes së shortit.