Kosova i ka rënë tri vende më poshtë në renditjen botërore të FIFA-s për ekipet kombëtare, si pasojë dy humbjeve në dy ndeshjet kualifikuese për Kupën e Botës 2022 muajin e kaluar.
Kombëtarja e Kosovës zë vendin e 120-të në renditjen e re të FIFA-s të publikuar të mërkurën.
Kjo rënie nga vendi i 117-të në atë të 120-të erdhi si pasojë e disfatave kundër Suedisë 3:0 në shtëpi dhe 3:1 kundër Spanjës në udhëtim në dy ndeshjet e para të dardanëve në Grupin B kualifikues për Botërorin e Katarit.
Në ranglistën paraprake, Kosova renditej e 117-ta me 1155 pikë në përgjithësi.
Derisa fitorja në një ndeshje miqësore kundër Lituanisë nuk ndikoi për rritjen e numrit të pikëve, për shkak të nivelit të ndeshjes, dështimet në dy ndeshjet pasuese me karakter garues i kushtuan Kosovës dyfishin.
Përveç se mbeti pa pikë në Grupin B kualifikues në vendin e parafundit, ekipi kombëtar verdhekaltër humbi pikë edhe në renditjen e përgjithshme të FIFA-s.
Kosova tani ka 1151.78 pikë në vendin e 120-të, pothuajse baras me Taxhikistanin një vend më poshtë dhe pesë pikë larg Libisë në vendin e 119-të.
Kosova nuk do të ketë më ndeshje garuese deri në shtator, kur rikthehen kualifikueset e Botërorit, ndërsa ranglista e re do të publikohet më 27 maj.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
© Reporteri (R Media L.L.C.), 2019-2025. Të gjitha të drejtat e rezervuara.