Kombëtarja e Ukrainës ka shënuar fitoren e parë në Kampionatin Evropian “Euro 2020”.

Pas humbjes nga Holanda, të përzgjedhurit e Andriy Shevchenkos kanë mposhtur Maqedoninë e Veriut.

Ndeshja e zhvilluar sot në Bukuresht të Rumanisë, përfundoi me rezultatin 2-1.

Andriy Yarmolenko dhe Roman Yarmechuk shënuan golat e fitores për ukrainasit, kurse golin e vetëm për Maqedoninë e shënoi futbollisti shqiptar, Ezgjan Alioski.

Ukraina tani ka tre pikë dhe renditet e treta në Grupin C, kurse Maqedonia e Veriut mbetet e fundit me zero pikë.

Austria dhe Holanda kanë gjithashtu tre pikë dhe renditen në dy pozitat e para në këtë grup. Këto dy kombëtare takohen mes vete sonte nga ora 21:00.