Ballkani aktualisht është lider i Superligës së Kosovës, derisa në këtë kohë të pandemisë COVID-19 kampionati është i pezulluar dhe nuk dihet se kur do të rifillojë përsëri.

Liridon Fetahaj, futbollisti i skuadrës nga Suhareka në një intervistë ekskluzive për ‘Gazeta Sheshi’ ka treguar se Ismet Munishi i përcjell stërvitjet e futbollistëve të tij edhe nga distanca.

Futbollistët e Ballkanit kanë një program ku trajneri ia dërgon stërvitjet që duhet t’i bëjnë dhe njëkohësisht ai i përcjell live me GPS.

“Pandemia po na shkakton shumë telashe, por shëndeti është në radhë të parë. Ne kemi një program që na ka dërguar trajneri, i cili na përcjell LIVE me GPS stërvitjet të cilat na i cakton çdo ditë. Ai e do shumë futbollin,” ka thënë Fetahaj për Gazeta Sheshi.

Anësori i Ballkanit ka bërë të ditur se futbollistët komunikojnë vazhdimisht me njëri-tjetrin edhe pse fizikisht nuk mund të qëndrojnë bashkë shkaku i pandemisë.

“Ne komunikojmë mes vete, në klub ka marrëdhënie të shkëlqyera mes lojtarëve dhe trajnerëve”.

Sa i përket pagave, Ballkani nuk ka bërë ndonjë zbritje dhe i ka kryer sot obligimet për futbollistët dhe Fetahaj i është mirënjohës presidentit të klubit.

“Ka klube të cilat vërtetë kanë probleme dhe shpresoj që t’i ndihmojë dikush, ndërsa për Presidentin tonë e falënderoj edhe unë publikisht sikur Edvin Kuc”.

Sa i përket asaj se kush duhet të shpallet kampion në rast se kampionati nuk do të mund të zhvillohet Fetahaj dha këtë përgjigje:

“Ne kemi bërë një rrugëtim të madh deri tani dhe nuk është e drejt të mos jemi kampion në rast se nuk mund të vazhdohet kampionati. Ne jemi me meritë në vendin e parë,” përfundoi Fetahaj.