Tentativa për t’u larguar nga Barcelona, e cila rezultoi e pasuksesshme, nuk e ka cënuar reputacionin e Lionel Messit në klubin “blaugrana”.

Gjashtë herë fitouesi i “Topit të Artë” është votuar nga futbollistët si kapiteni i parë e ekipit, duke rikonfirmuar kështu kredencialet që “ylli” argjentinas kishte edhe para se të dërgonte “burofax”-in e famshëm, për të kërkuar largimin nga Barcelona.

Kriter për përzgjedhjen nuk ka qenë mosha e lojtarëve, por impakti i tyre në dhomat e zhveshjes.

Grupi i plotë i kapitenëve është i njëjtë me atë të sezonit të kaluar. Pas Leo Messit, kapiten i dytë është Sergio Busquets, pastaj Gerard Piqué dhe Sergi Roberto.

Të katër lojtarët që bëjnë pjesë në grupin e kapitenëve vijnë nga La Masia. Për Busquets do të jetë sezoni i tretë radhazi si kapiten i dytë i ekipit.