Kombëtarja e Kosovës do t’i zhvillojë tri ndeshje shumë të rëndësishme në muajin shtator në kuadër të Kampionatit Botëror “Katar 2022”.

Më 2 shtator, fillimisht, Kosova do të përballet me Gjeorgjinë si mysafire, kurse më 5 dhe 8 shtator, “Dardanët” presin në stadiumin “Fadil Vokrri” Greqinë, po ashtu dhe Spanjën.

Gjatë ditës së djeshme, në shtypin anglez u raportua se klubet e Premierligës nuk do t’i lejojnë futbollistët t’iu bashkohen kombëtareve të tyre për ndeshjet e shtatorit shkaku i pandemisë COVID-19.

Në bazë të kësaj, nënkuptohet se edhe lojtari Milot Rashica që luan për klubin anglez Norwich City, nuk do të mund t’i bashkohet Kombëtares së Kosovës për ndeshjet e shtatorit.

Mirëpo drejtori sportiv i Përfaqësueses së Kosovës, Muharrem Sahiti ka konfirmuar se Rashica do të jetë në dispozicion të trajnerit Challandes për ndeshjet e radhës.

“Kosova nuk është në listën e zezë të Mbretërisë së Bashkuar për rastet nga COVID-19, andaj Rashica do të jetë pjesë e Kosovës për ndeshjet e muajit mars”, ka thënë të mërkurën Muharrem Sahiti për FrontOnline.

I pyetur në lidhje me atë se kur do të bëhet publike lista e futbollistëve të ftuar nga Kosova për ndeshjet e shtatorit, Sahiti tha:

“Jemi duke pritur Challandesin të vie në Kosovë, besoj që shumë shpejt do të jetë këtu. Mendoj se ai e ka bërë listën, andaj mbetet ta presim që ta bëjë publike.