Nëse i pyesni shumicën e tifozëve të futbollit për portierin më të mirë në historinë e Premier League, shumica do të përmendin Peter Schmeichel-in ose Petr Cech-in. I pari ishte një figurë kyçe në dominimin e Manchester United gjatë viteve ’90, ndërsa i dyti mban rekordin për më së shumti ndeshje pa gol të pësuar në këtë ligë.

Schmeichel kaloi tetë vite në “Old Trafford”, përpara se ta përfundonte karrierën me periudha të shkurtra te Aston Villa dhe Manchester City. Cech u bashkua me Chelsean në vitin 2004 dhe kaloi 11 vite me “Bluve”, përpara se të transferohej te Arsenali, ku luajti për katër vite të tjera deri në pensionimin e tij në vitin 2019. Trashëgimia e tyre ka mbetur e paprekur edhe pas largimit nga futbolli, dhe ende nuk është shfaqur ndonjë portier që u afrohet në elitën e futbollit anglez.

Megjithatë, kjo nuk do të thotë se nuk ka pasur portierë të tjerë të jashtëzakonshëm jashtë Anglisë. Steven Gerrard, që ka luajtur kundër të dyve gjatë karrierës së tij me Liverpoolin, kur u pyet se kush ishte portieri më i mirë që ka përballuar ndonjëherë, nuk zgjodhi as njërin prej tyre. Përgjigja e tij ishte një emër nga Evropa.

Gianluigi Buffon, që bëri debutimin profesional në vitin 1995, pati një karrierë të jashtëzakonshme që zgjati 28 vjet. Ai e nisi te Parma, për të kaluar më pas 17 vite te Juventusi, ku fitoi nëntë tituj të Serie A. Pas një periudhe të shkurtër te Paris Saint-Germain, u rikthye te “Zonja e Vjetër” në vitin 2019, ku fitoi edhe një tjetër titull kampion. Në total, Buffon luajti 685 ndeshje për Juventusin përpara se të rikthehej te Parma për dy sezonet e fundit të karrierës së tij.

Sukseset e tij nuk ishin vetëm në nivel klubi – Buffon ishte një figurë kyçe në triumfin e Italisë në Kupën e Botës 2006. Ai konsiderohet si një nga futbollistët më të mëdhenj që nuk e kanë fituar kurrë Ligën e Kampionëve, por la një përshtypje të thellë tek Gerrard. Gjatë një episodi të “The Greatest Game Podcast”, të cituar nga Mirror, Gerrard u shpreh thjesht:

“Buffon, portieri më i mirë që jam përballuar ndonjëherë.”

Nuk pati asnjë hezitim nga legjenda e Liverpoolit. Ai u përball me Buffon në Evropë dhe ndikimi i italianit në fushë ishte i paharrueshëm.