Qeveria e Kosovës në kuadër të pakos financiare për të mbështetur shtresa të ndryshme të sektorit privat, ka paraparë edhe sportin.

Sipas një njoftimi të lëshuar nga Ministria e Financave dhe Transfereve, për sportin janë ndarë 5 milionë euro.

“Masat e Qeverisë së Republikës së Kosovës kanë goditur rëndë edhe aktivitetet sportive, kulturore dhe artistike. Për të ndihmuar këto kategori, do të rritet për 5 milionë euro buxheti i Ministrisë së Kulturës, Rinisë dhe Sportit, shumë kjo që do të përdoret për subvencionim shtesë të shoqatave sportive e kulturore të vendit”, thuhet në njoftimin e ministrisë.

Nuk dihet procedura e ndarjes dhe vlerësimit dhe se a bëhet fjalë edhe për mbështetje në paga të sportistëve, shkruan Reporteri.

Aktualisht janë ndalur të gjitha garat sportive në vend, sikurse edhe në krejt Evropën. /Reporteri