Ministria e Punëve të Jashtme e Gjermanisë, ka thënë se Projektligji i Serbisë për shpalljen e Kosovës zonë të mbrojtjes së veçantë dhe për organizimin e juridiksionit të saj në çështje penale në Kosovë, shkel detyrimet e saj të Dialogut të arritura në Bruksel me ndërmjetësimin e Bashkimit Evropian.

Kjo deklaratë u dha në platformën “X”, ku MPJ gjermane i ka kërkuar Serbisë të rishqyrtojë vendimet e marra, raporton gazeta online Reporteri.net.

“Projektligji i Serbisë për shpalljen e Kosovës zonë të mbrojtjes së veçantë dhe për juridiksionin mbi veprat penale, shkel qartë obligimet e saj nga dialogu. I kërkojmë Serbisë që ta rishqyrtojë. Të dyja shtete, Kosova dhe Serbia, duhet të zbatojnë marrëveshjen e Ohrit të vitit 2023 pa vonesë, duke përfshirë Asociacionin e komunave me shumicë serbe”, ka shkruar Ministria e Jashtme gjermane.

Serbia’s draft legislation on declaring Kosovo an area of special protection and on jurisdiction of criminal offences clearly violates its Dialogue obligations. We ask Serbia to reconsider. Both countries 🇽🇰🇷🇸 must implement the 2023 Ohrid agreement without delay, including ASMM.

— GermanForeignOffice (@GermanyDiplo) November 1, 2024

Lidhur me këtë postim ka reaguar edhe ambasadori gjerman në Kosovë, Jorn Rohde, i cili ka shpërndarë postimin e Zyrës së Jashtme Gjermane.

Sipas Rohdes i cili ka shpërndarë këtë kërkesë, një veprim i tillë i Serbisë përbën shkelje të qartë të obligimeve të Dialogut.

“Gjermania i kërkon Serbisë të rishqyrtojë projektligjin e saj që e shpall Kosovën zonë të mbrojtjes së veçantë dhe juridiksionit të veprave penale pasi kjo do të përbënte shkelje të qartë të obligimeve të Dialogut”, ka shkruar Rohde.

Germany 🇩🇪 asks Serbia 🇷🇸 to reconsider its draft legislation declaring Kosovo an area of special protection and jurisdiction of criminal offences since this would constitute a clear violation of Dialogue obligations https://t.co/joCHrqlGS8

— Ambassador Jörn Rohde (@GermanAmbKOS) November 1, 2024

Shtetet e Bashkuara të Amerikës dhe Bashkimi Evropian e patën kritikuar ditët e fundit Serbinë për këto vendime.

Ato thanë se Serbia ka shkelur detyrimet nga dialogu i Brukselit duke miratuar projektligjin për juridiksionin gjyqësor në Kosovës dhe projektligjin tjetër.

/Reporteri.net/.