Kreu i Partisë Demokratike, Sali Berisha ka deklaruar se nuk do të pranojë rezultatin e zgjedhjeve parlamentare të mbajtura në 11 maj, teksa ka thirrur një protestë më 16 maj, ditë në të cilën në Tiranë do vijnë liderët europianë në kuadër të Samitit të Komunitetit Politik Europian.

Në një konferencë për shtyp, Berisha tha se votat “janë grabitur” nga Partia Socialiste, ndërsa kryeministrin Edi Rama e cilësoi si “përbindësh elektoral”.

Ai shtoi se protesta do të mbahet në orën 17 në “Bulevardin Zogu i Parë”, ndërsa theksoi se u zgjodh e njëjta ditë kur do të zhvillohet edhe Samiti për të “sensibilizuar opinionin publik botëror mbi krimet monstruoze elektorale”.

“Këto ishin zgjedhje që u sunduan si asnjëherë më parë nga vrasës, seria killera, trafikantë, dhunues, përdhunues. Zgjedhjet e 11 Majit u karakterizuan nga blerja publike më masive në tërë historinë e zgjedhjeve në Shqipëri. Zarfi me 100 euro, i dërguar në mes të fushatës elektorale dhe amnistia prej 200 milionë euro gjoba dhe kamata nga viti 2015 deri në vitin 2025, është blerja publike më e fuqishme që ka ndodhur në historinë e vendit. Dhjetëra mijëra hektarë kanabis që u dhanë licencat për t’u mbjellë. Çdo bimë kanabis me prodhim fitimi 1 mijë euro, është përllogaritur për blerje votash në mënyrën më të pamëshirë. Libri i zi i këtyre zgjedhjeve shkruhet në datën 16 në orën 17 në Bulevardin Zogu I për të sensibilizuar opinionin publik botëror mbi krimet monstruoze të përbindëshit elektoral Edi Rama që nuk respekton asnjë rregull, asnjë ligj për zgjedhjet. Protesta do të jetë paqësore. Garantoj se nuk do të ketë probleme që do cenojnë në shkallën më të vogël sigurinë e dinjitarëve që vijnë, por duam që ata të mësojnë se kanë qenë të ftuar nga një narko-diktator që nuk njeh ligj e as moral për votën e qytetarëve të tij. Nuk bëhet fjalë kurrë të pajtohem me këto zgjedhje. Ne kemi bërë gjithçka në përputhje me ligjin sa na takonte se si opozitë që Shqipëria të ketë zgjedhje. Protesta e datës 16 është një protestë në emër të një populli që votën ja dikton revolja pas koke, siç ka ndodhur në Peshkopi”, tha Berisha.

Teksa janë numëruar më shumë se 95% e votave në vend, koalicioni PD-ASHM ka marrë 52 mandate, një rezultat më i ulët se në zgjedhjet e viti 2021, ku PD garoi si pjesë e koalicionit “Partia Demokratike-Aleanca pë Ndryshim” dhe mori 59 mandate.