Edhe njëherë tjetër të gjitha biletat për ndeshjen e radhës të Kosovës u ‘avulluan’ brenda 100 minutave.

Dje u shitën të gjitha biletat për takimin Kosovë – Mali i Zi, që zhvillohet më 14 tetor në stadiumin mitik ‘Fadil Vokrri’.

Të hënën në orën 16:00 uebsajti që merret me shitjen e biletave ‘’tiks.app’’ u vërshua nga mijëra klikime brenda vetëm pak çastesh, shkruan lajmi.net.

Shitja e shpejtë e biletave ka qenë një nga kritikat e tifozëve, të cilët assesi nuk po munden të sigurojnë një biletë për ta parë nga afër skuadrën dardane.

Por tregu i zi vazhdon të lulëzojë edhe kësaj radhe, me çmime jashtëzakonisht të mëdha.

Në faqet online ku bëhet shitja e biletave mund të shihet një numër të madh postimesh për shitje të biletave.

Njëri nga ta shet dy bileta nga pjesa lindore për 100 euro, që i bie shumëfish më shtrenjtë. Çmimi i biletave për këtë pjesë ishte nga 10 deri në 15 euro.