Deputetja e LDK-së, Hykmete Bajrami, ka thënë se sot është parë qartë se kush po e bllokon themelimin e institucioneve të reja.
Ky reagim i Bajramit ka ardhur pasi është ndërprerë seancë për konstituimin e Kuvendit, meqë LVV s’ka pasur votë për propozimet e LDK dhe PDK për nënkryetar dhe e kanë bërë çështje mënyrën e propozimit të kandidatit të Listës Serbe për nënkryetar.
“Kush po i bllokon institucionet? Sot besoj se e patë të gjithë”, ka shkruar Bajrami.
Në më pak se një muaj, Kosova mund të përballet me një gjendje të pasigurt kushtetuese, nëse deri më 4 tetor nuk zgjidhet presidenti i ri i shtetit. Ekspertë ligjorë thonë se kryeparlamentari nuk mund ta vazhdojë këtë detyrë përtej këtij afati gjashtëmujor.
Ushtruesja e tanishme e kësaj detyre, Albulena Haxhiu, u rizgjodh kryetare e Kuvendit të Kosovës më 9 shtator, ndërsa më herët nga partia e saj, Lëvizja Vetëvendosje në pushtet, është hedhur ideja se kryetarja e re e Kuvendit mund ta vazhdojë edhe një gjashtëmujor të dytë në rast nevoje.
Edhe Presidenca – të cilën e udhëheq Haxhiu që nga 4 prilli, kur presidentes së deriatëhershme, Vjosa Osmani, i mbaroi mandati – ka thënë se kryetarja e re e Kuvendit do të vazhdonte ushtrimin e detyrës së presidentit deri në zgjedhjen e presidentit të ri.
Posti i ushtruesit të detyrës së presidentit të Kosovës nuk mund të ushtrohet për një periudhë më të gjatë se gjashtë muaj, sipas Kushtetutës.
Vullnet Bugaqku nga Instituti Demokratik i Kosovës vlerëson se Haxhiut, si kryetare e Kuvendit, mandati si ushtruese e detyrës së presidentit i përfundon më 4 tetor.
“Pas kësaj date skadon afati i gjashtëmujor dhe ligjërisht i njëjti ose e njëjta nuk ka të drejtë që të funksionojë edhe si ushtrues i detyrës së presidentit, për shkak se është në kundërshtim me nenin 90, paragrafin 3, të Kushtetutës së Kosovës”, tha Bugaqku për REL-in të mërkurën, pasi Haxhiu u rizgjodh kryeparlamentare.
Sipas Bugaqkut, çdo vendim apo dekret që mund të nxirret pas kësaj date nga Haxhiu është i kontestueshëm për nga kushtetutshmëria, dhe rrezikon të rrëzohet nga gjykatat.
Ai thotë se deputetët duhet ta shohin si alarmues afatin kohor deri më 4 tetor për zgjedhjen e presidentit.
Haxhiu e ndërpreu seancën konstituive të mërkurën, duke e shtyrë për të premten vazhdimin e saj për përmbylljen e konstituimit të Kuvendit.
Ajo tha se nuk kishte pajtueshmëri për mënyrën e votimit të nënkryetarëve dhe se deputeti i Listës Serbe, Igor Simiq, dështoi ta tërhiqte fjalën “në emër të popullit serb”, kur e propozoi kandidatin për nënkryetar nga komuniteti serb.
Ndërkohë, drejtori ekzekutiv i Institutit të Kosovës për Drejtësi, Ehat Miftaraj, thotë për REL-in se Kushtetuta e Kosovës e lidh kufizimin gjashtëmujor me ushtrimin e postit të presidentit, e jo me personin që e ushtron atë.
Sipas Miftarajt, për këtë arsye, ndryshimi i personit që e ushtron detyrën e presidentit, apo rizgjedhja e kryetarit të Kuvendit, nuk mund të ketë efektin e fillimit të një afati të ri gjashtëmujor.
“Një interpretim i tillë do të mundësonte që, përmes ndryshimit të personit, gjendja e ushtrimit të detyrës së Presidentit të vazhdonte përtej kufirit prej gjashtë muajsh të përcaktuar shprehimisht me Kushtetutë’’, thekson ai.
“Tejkalimi i 4 tetorit pa një president të ri cenon sigurinë e shtetit”
Bugaqku shton se, për shtetin dhe sistemin kushtetuese parlamentar në Kosovë, tejkalimi i afatit të 4 tetorit do të thotë “një njollë shumë e keqe dhe një precedent i rrezikshëm që cenon edhe sigurinë kombëtare”.
Më 4 tetor përfundon periudha gjashtëmujore gjatë së cilës, sipas Kushtetutës, postin e presidentit të Kosovës mund ta mbajë një ushtrues detyre.
Deputeti i LVV-së, Adnan Rrustemi, kishte thënë më herët për REL-in se pozita e ushtruesit të detyrës së presidentit “është e varur nga pozita e kryetarit të Kuvendit”.
Sipas tij, pas zgjedhjes, kryetari i ri i Kuvendit nis ushtrimin e detyrës së presidentit deri në zgjedhjen e presidentit. Afati prej gjashtë muajsh, i përcaktuar nga Kushtetuta, nis të rrjedhë nga fillimi, me zgjedhjen e kryetarit të ri të Kuvendit, pretendoi ai.
“Është në frymën dhe përmbajtjen, por edhe në funksionin e Kushtetutës, që të garantojë vazhdimësi institucionale. Asnjëherë, e për asnjë arsye, vendi nuk mund të mbetet pa president apo pa ushtrues detyre të presidentit. Vakum institucional nuk mund të ketë në asnjë rrethanë”, deklaroi Rrustemi për REL-in.
Më herët, Eugen Cakolli, hulumtues në Institutin Demokratik të Kosovës, i kishte thënë REL-it se periudha gjashtëmujore për ushtrimin e detyrës së presidentit përbën afat absolut, dhe si i tillë nuk mund të përsëritet në asnjë skenar.
Moszgjedhja e presidentit të ri, deri më 4 tetor, sipas Cakollit, përbën skenarin më të rrezikshëm kushtetues me të cilin mund të ballafaqohet Kosova.
“Në një situatë të tillë, vendi do të hynte në një terren kushtetues, i cili, përveçse do të ishte serioz dhe i rrezikshëm, do të duhej medoemos të kishte parashtresë në Gjykatën Kushtetuese”, theksoi ai.
Melos Kolshi, hulumtues ligjor në Institutin e Kosovës për Drejtësi, i tha REL-it se pas 4 tetorit, çdo vazhdim i ushtrimit të detyrës së presidentit do të ishte pa bazë kushtetuese, dhe do të cenonte seriozisht rendin kushtetues.
Partitë opozitare shqiptare nuk janë deklaruar për këtë çështje publikisht.
Partia Demokratike e Kosovës (PDK), Lidhja Demokratike e Kosovës (LDK) dhe Aleanca nuk iu përgjigjën as pyetjeve të REL-it rreth kësaj çështjeje.
Çështja e zgjedhjes së presidentit ka qenë në zemër të krizës politike në vend dhe shkaktoi zgjedhje të reja parlamentare në qershor.
Një marrëveshje e brishtë mes LVV-së dhe LDK-së për kandidaturën e diplomatit dhe juristit kosovar, Bekim Sejdiu, nuk duket ta ketë mbështetjen e nevojshme, pasi edhe deputetë nga vetë LDK-ja e kanë kundërshtuar publikisht.Nevojitet prania e 80 deputetëve në
Kuvendin me 120 vende që votimi për presidentin e Kosovës të jetë i vlefshëm.
LVV-ja ka 53 mandate, ndërsa LDK-ja 18.
Maskaradë e ka quajtur kryetari i Aleancës, Ardian Gjini, shtyrjen e seancës konstituive të Kuvendit për të premten. Ai tha se Lëvizja Vetëvendosje, përmes zvarritjes së konstituimit të legjislativit, po tenton që të mbajë zgjedhjet e reja më 27 dhjetor.
Kuvendi i Kosovës nuk u konstituua më 9 shtator, pasi kishte mospajtime për mënyrën dhe formën e zgjedhjes së nënkryetarëve. Në LVV thanë se s’kanë vota për propozimet e PDK-së dhe LDK-së për nënkryetarë.
“A ju kemi thënë që nuk kanë me konstitu Kuvendin sot. Kush e din për të sa herë, me koordinim apo pa koordinim, Lista Serbe i ndihmon që Albin Kurti me zhvillu agjendën e vet ashtu qysh i konvenon. Kjo çka ka ndodhë është një maskaradë për me shty kohë apo me ble kohë. Është qëllimi i pastër për me ble kohë, për me zvarrit krijimin e institucioneve të Kosovës. Po besoj sot që të gjithë qytetarët e Kosovës e kuptojnë drejt pse Aleanca nuk ka pranu me u bë pjesë e kësaj maskarade. Siç i kam ftuar më herët, i ftoj edhe tash partitë e ish-opozitës me refuzu me u bë pjesë e kësaj maskarade…Duan të mbërrijnë së paku datën 13 shtator, në mënyrë që të kalkulohet edhe 60-ditëshi i afatit për zgjedhjen e presidentit dhe 45 deri në shkuarje në zgjedhje, që me mbërrijë datën 27 dhjetor”, tha Gjini në konferencë për media të mërkurën.
Ai tha se do t’i referohen Gjykatës Kushtetuese për moskonstituimin e Kuvendit brenda afateve kushtetuese.
“Nuk kemi rrugë tjetër përveç me iu referuar Gjykatës Kushtetuese. Do të synojmë koordinim me dy partitë të tjera dhe po absolutisht duhet referu Kushtetutës. Të përgatitet lënda sa më mirë dhe të gjendet momenti kur të dërgohet kjo lëndë në Kushtetuese”, tha ai.
Krahas kësaj, ai tha se nuk do të marrin pjesë të premten, kur u vendos të vazhdojë seanca konstituive.
“Në seancën e së premtes nuk do të marrim pjesë. Për pak fola si Dehari. Nuk mund të marrim pjesë sepse është e jashtëligjshme, jashtëkushtetuese dhe është farsë. Nuk ka për qëllim me themelu institucionet”, përfundoi ai.
Kryetarja e Kuvendit, Albulena Haxhiu, ka ndërprerë seancën konstituive pas mospajtimeve mes subjekteve politike lidhur me votimin e nënkryetarëve të Kuvendit.
Kryetari i Lëvizjes Vetëvendosje, njëherësh kryeministër në detyrë, Albin Kurti, bëri të ditur se ka kontaktuar kryetarët e LDK-së dhe PDK-së për t’u takuar dhe arritur dakordim për zgjedhjen e nënkryetarëve të Kuvendit të Kosovës.
Kurti tha se për përmbylljen e procesit të konstituimit të Kuvendit duhet të zgjidhen edhe nënkryetarët.
“Që të përmbyllet me sukses të plotë, duhet të zgjidhen edhe nënkryetarët, e për këtë nevojitet dakordim. Unë tashmë jam në kontakt, përveçse me kryetarin e LDK-së, gjithashtu i kam shkruar edhe atij të PDK-së që të takohemi dhe në këtë mënyrë të kemi dakordim. Le të jemi pozitivë e konstruktivë”, tha Kurti.
Ai komentoi edhe deklaratën e deputetit të Listës Serbe, Igor Simiq, i cili gjatë propozimit të Sllavko Simiqit për nënkryetar të Kuvendit tha se këtë e bënte “në emër të popullit serb”.
“Siç e tha edhe kryetarja e Kuvendit, deklarata e përfaqësuesit të Listës Serbe ishte në shpërputhje me kushtetutshmërinë e Kosovës, me betimin që ai vetë e ka bërë dhe për mua ishte e çuditshme pse ai nuk e lexoi saktësisht siç e ka deponuar me shkrim propozimin për Sllavko Simiqin. Dikush nga grupi parlamentar tha që kjo mund të jetë edhe në kuadër të euforisë së tij nga varrimi i Ratko Mladiqit, i komandantit që masakroi boshnjakët. Nuk mund të votohet në Kuvend ai lloj propozimi që u deklarua, vetëm ai me shkrim”, tha Kurti.
Deputetja e PDK-së, Ganimete Musliu, ka akuzuar kryeministrin në detyrë, Albin Kurti se është në koordinim me Listën Serbe për të mos lejuar konstituimin e Kuvendit para 16 shtatorit.
Përmes një postimi, Musliu ka thënë se Kurti dhe Lista Serbe nuk duan që Kosova të ketë Kuvend të konstituuar para kësaj date.
“Albin Kurti në koordinim të plotë me Listën Serbe nuk duan të kemi Kuvend para datës 16 shtator”, ka shkruar Musliu.
Ajo ka thënë se, pavarësisht zhvillimeve politike, historia e Kosovës nuk mund të ndryshohet.
“E keni të kotë! Nuk do mund ta rishkruani historinë!”, ka deklaruar deputetja e PDK-së.
Musliu ka përmendur disa prej vendeve që, sipas saj, janë pjesë e historisë së luftës dhe sakrificës së shqiptarëve për liri, përfshirë Prekazin, Çirezën, Likoshanin, Likocin, Reçakun, Abrinë, Poklekun, Krushën dhe Mejën.
“Është shkruar me gjakun dhe sakrificën e njerëzve tanë”, ka përfunduar Musliu.
Deputetja e Lëvizjes Vetëvendosje, Arbërie Nagavci, ka thënë se përveç që nuk kanë votë për nënkryetarin e Kuvendit të propozuar nga Lista Serbe pa tërhequr deklaratën Igor Simiqi, votë nuk kanë as për propozimin e PDK-së për nënkryetare, Vlora Çitaku e as për propozimin e LDK-së për nënkryetar, Kujtim Shala.
Sipas Nagavcit, Çitaku e Shala publikisht kanë deklaruar se nuk do ta votojnë presidentin kësisoj nuk kanë pse i kërkojnë votat e VV-së për nënkryetar.
“Ishin dy çështje pse u shty seanca e sotme. E para ka të bëjë me kushtetutshmërinë, dhe e dyta ka të bëjë me propozimet e PDK-së e LDK-së Deklarata e Simiqit është e papranueshme dhe bie ndesh me Kushtetutën. Kërkova ta tërheq fjalën, pat deputet që nuk e konsideruan problematike. E çështja e dytë është se propozimet e PDK-së dhe LDK-së, Vlora Çitaku përkatësisht Kujtim Shala, që të gjithë jemi dëshmitarë që të dy deputetët ndërkohë kërkojnë votë për veten e tyre, të njëjtit deputetë thonë se nuk do të marrin pjesë në votimin e presidentit dhe po na çojnë drejt zgjedhjeve të reja. Për VV-në është shumë e rëndësishme edhe të kemi konstituimin e Kuvendit, edhe formimin e qeverisë dhe zgjedhjen e presidentit sa më shpejt”, ka thënë ajo.
Deputetja e LDK-së, Jehona Lushaku, ka kritikuar Lëvizjen Vetëvendosje për mosvazhdimin e procedurës së votimit për nënkryetarët e Kuvendit.
Lushaku e ka cilësuar situatën si të paprecedentë, duke thënë se grupi më i madh parlamentar po pengon vazhdimin e procesit në mungesë të përkrahjes për propozimet e partive të tjera.
“Kjo është situatë e paprecedentë ku nuk vazhdohet konstituimi në mungesë të përkrahjes nga grupi më i madh për propozimet për nënkryetarë që i kanë bërë partitë e tjera”, tha Lushaku.
Seanca konstituive e kuvendit është shtyrë për të premten në orën 11:00.
Kështu ka njoftuar kryetarja e Kuvendit Albulena Haxhiu.
Kjo erdhi pasi që deputeti i Listës Serbe, Igor Simiq, propozoi Slavko Simiqin për nënkryetar të Kuvendit, duke thënë se këtë po e bën ‘’në emër të popullit serb’’.
Përveç Haxhiut që u zgjodh kryetare e kuvendit, asnjëri nga nënkryetarët e propozuar nga partitë s’është zgjedhur për këtë pozitë.
Ndryshe, Vetëvendosja ka propozuar për nënkryetar kuvendi, Ardian Golën.
Partia Demokratike e Kosovës, ka propozuar Vlora Çitaku.
Lidhja Demokratike e Kosovës, ka propozuar Kujtim Shalën.
Ndërsa deputetët nga komunitetet jo shumicë kanë propozuar Slavko Simiq, dhe, Emilija Rexhepin.
Kryetarja e Kuvendit, Albulena Haxhiu ka kërkuar nga deputeti Igor Simiq që ta tërheqë formulimin e propozimit të nënkryetarit “në emër të popullit serb”.
“Tërhiqeni fjalën që ishte në kundërshtim me Kushtetutën e Kosovës dhe pastaj vazhdojeni propozimin”, i tha Haxhiu, Simiqit.
Simiq, gjatë propozimit të Sllavko Simiqit si kandidatit për nënkryetar të Kuvendit nga komuniteti serb, kishte thënë se ai po propozohej “në emër të popullit serb”.
Haxhiu e ka cilësuar këtë deklaratë si të papranueshme dhe në kundërshtim me Kushtetutën e Kosovës./Reorteri.net/
Deputetja e Vetëvendosjes, Arjeta Fejza, iu bashkua thirrjeve të bashkëpartiakëve të saj për sanksionimin e deputetit të Listës Srpska, Igor Simiq, i cili gjatë propozimit të kandidatit të kësaj partie për nënkryetar Kuvendi, tha “në emër të popullit serb”.
Ajo i bëri thirrje Prokurorisë që ta merret me rastin, duke thënë se kjo deklaratë e “sfidon rendin kushtetues”.
““Në emër të popullit serb”, tha në Kuvendin e Kosovës përfaqësuesi i Listës Serbe. Ku po mendon që është ky njeri, në çfarë realiteti jeton? Kushtetuta e Republikës së Kosovës është e qartë: Kuvendi është institucion i Republikës së Kosovës dhe përfaqëson popullin e Kosovës. I bëj thirrje Prokurorisë që ta trajtojë këtë deklaratë, e cila sfidon vetë rendin kushtetues të Republikës së Kosovës”.
Deputeti i LVV-së, Ilir Kërçeli, ka reaguar pasi LDK ka propozuar Kujtim Shalën për nënkreytar të Kuvendit të Kosovës.
Kërçeli ka kujtuar deklarimet e Shalës kundër bashkëpunimit me Lëvizjen Vetëvendosje duke i thënë se votat e kujt po i kërkon tani që dëshiron të zgjidhet nënkryetar.
Postimi i plotë:
Kujtim Shala është deklaruar se është votuar për të mos bashkëpunuar me Albin Kurtin.
Tash po i kërkon votat e Lëvizjes për tu bërë nënkryetar.
Prej kujt po kërkon votë tash?! Ai që nuk ka votë madje as kundër Presidentit e as nuk rri në sallë?!
Deputetja e LVV-së dhe ministrja në detyrë, Donika Gërvalla, ka thënë se mënyra e propozimit të Listës Serbe për nënkryetar të Kuvendit është e papranueshme.
Gërvalla ka thënë se në Kosovë s’ka popull serb, por komunitet serb, duke u ndërlidhur me mënyrën e propozimit nga Lista Serbe.
Igor Simiq ka thënë se e propozon emrin e Slavko Simiq për nënkryetar të Kuvendit në “emër të popullit serb”.
Deputeti i Partisë Demokratike të Kosovës (PDK), Përparim Gruda, ka thënë se zhvillimet e fundit në Kuvend janë, sipas tij, në kundërshtim me Kushtetutën, ndërsa ka paralajmëruar se do t’i trajtojnë këto çështje pas 16 shtatorit përmes rrugëve politike dhe institucionale.
Ndërkaq, Gruda ka bërë të ditur se PDK-ja ka propozuar Vlora Çitakun për nënkryetare të Kuvendit.
“Në emër të PDK-së për nënkryetarë të Kuvendit e propozojmë Vlora Citaku. Jemi këtu për të konstituar kuvendin e Kosovës dhe propozojmë emrin për nënkryetar, por nuk mund të mos themi që kjo që ka ndodhur nga 6 shkurti është një situatë komplet jo kushtetuese. Ne kemi ardhur sot për shkak se Kosova është para një vendimi historik, para vendimit në Hagë për Hashim Thaqin, Kadri Veselin dhe të tjerët, 16 shtatorin. Për hir të kësaj date ne s’kemi dashur të mbivendosim konfliktin politik ose dilemat kushtetuese kësaj date dhe kemi ardhur sot këtu. Por, për neve gjithçka që ka ndodhur këto muaj nuk mund të kalojë, dhe ne gjitha këto shkelje kushtetueses dhe rregullores do t’i trajtojmë politikisht dhe në rrugë tjera institucionale pas datës 16 shtator. Sepse, nuk mendoj se duhet të pranojmë si normalitet kthimin e pushtetiti të par6tisë që ka fituar zgjedhjet në sallë pa dhënë llogari për shkeljet kushtetuese që kanë ndodhur”, ka thënë Gruda.
Seanca konstituive ka shkuar në pauzë prej 30 minutash. Kryeparlamentarja e sapozgjedhur, Albulena Haxhiu, ka thënë se me partitë nuk është arritur dakordimi për mënyrën e votimit të nënkryetarëve të Kuvendit.
Lëvizja Vetëvendosje, propozoi Ardian Golën, PDK-ja propozoi Vlora Çitakun si dhe LDK-ja Kujtim Shala.
Ndërsa nga radhët e komunitetit serb u propozua Sllavko Simiq.
Kurse nga radhët e komunitetit joshumicë Emilja Rexhepin./Reporteri.net/
Pas zgjedhjes së kryetarës së Kuvendit, partitë politike propozuan emrat për nënkryetarë.
Lëvizja Vetëvendosje, propozoi Ardian Golën, PDK-ja propozoi Vlora Çitakun si dhe LDK-ja Kujtim Shala.
Ndërsa nga radhët e komunitetit serb u propozua Sllavko Simiq.
Kurse nga radhët e komunitetit joshumicë Emilja Rexhepin.
Albulena Haxhiu është zgjedhur kryetare e Kuvendit. Ajo do ta udhëheqë legjislaturën e 11-të të dalë nga zgjedhjet e 7 qershorit.
Haxhiu mori 62 vota për, 16 kundër, ndërsa 13 abstenuan.
Haxhiu cila ushtron edhe postin e presidentit nga 5 prilli, do të vazhdojë edhe më tutje këtë detyrë deri në zgjedhjen e presidentit të ri./Reporteri.net/
Albulena Haxhiu është e propozuara e VV-së për kryetare të Kuvendit në vazhdimin e seancës konstituive që sapo ka nisur.
Në sallë janë të pranishëm 101 deputetë.
Haxhiu qe kryetare e Kuvendit edhe në legjislaturën e shkuar.
Ajo është edhe ushtruese detyre e presidentes./Reporteri.net/
Ka nisur vazhdimi i seancës konstituive të legjislaturës së 11-të të Kuvendit, të dalë nga 7 qershori.
Seanca konstituive e Kuvendit nuk vazhdoi për një muaj të plotë prej ndërprerjes së fundit më 8 gusht.
Kryesuesi i seancës, Avni Dehari, kishte pranuar kërkesën e kryeministrit në detyrë, Albin Kurti, që t’u jepet kohë shtesë për të arritur një marrëveshje politike për presidentin para se të vazhdohet me konstituim të Kuvendit.
Kurti atëherë kishte deklaruar se “konstituimi kësaj radhe nuk bën të jetë drejt një shpërndarjeje të Kuvendit dhe përsëri zgjedhjeve të parakohshme, të paarsyeshme e të panevojshme”./Reporteri.net/
Deputetja e PDK-së, Ganimete Musliu, ka mbërritur para pak minutash në ndërtesën e Kuvendit të Kosovës.
Ajo ka thënë se po shkon në mbledhjen e Grupit Parlamentar, duke paralajmëruar se do të ketë edhe veprime nga ana e Partisë Demokratike të Kosovës.
“Kosova nuk ka kohë të humbasë. Jemi jashtë çdo afati. Ky është hapi që na mundëson kthimin e kushtetutshmërisë. Tani do t’i shihni veprimet e PDK-së”, deklaroi Musliu.
Kryetari i Partisë Demokratike të Kosovës (PDK), Bedri Hamza, ka deklaruar para nisjes së seancës se nuk duhet të bëhen kalkulime politike që Kosova të mbetet pa Kuvend të konstituuar.
Nëse kjo seancë do të dërgohet në Gjykatë Kushtetuese për shqyrtim, Hamza tha se “është çështje që do ta vlerësojmë në ditët në vazhdim”.
Edhe deputeti i kësaj partie, Përparim Gruda, deklaroi se pas 16 shtatorit, ditës kur në Gjykatën Speciale merret vendimi për rastin e Thaçit dhe të tjerëve do të vendosin a e dërgojnë për interpretim kushtetues konstituimin e Kuvendit.
Megjithëse sipas tij Kuvendi duhet të përmbyllë konstituimin edhe pas afatit kushtetues.
“Shkelja e afatit nuk e shuan detyrimin për të themeluar Kuvendin”, tha Gruda para gazetarëve.
Kyeministri në detyrë, Albin Kurti, ka deklaruar se marrëveshja politike e arritur nuk është e mjaftueshme për të shmangur zgjedhjet e reja, pasi sipas tij nevojiten edhe votat për zgjedhjen e presidentit.
Kurti tha se për zgjedhjen e presidentit ose presidentes kërkohet pjesëmarrja e dy të tretave të deputetëve në Kuvend, ndërsa theksoi se duhet të jenë të pranishëm jo vetëm deputetët e palëve që kanë arritur marrëveshjen, por edhe deputetë të tjerë.
“Marrëveshje politike kemi, këtë e kemi arritur, por ajo duhet të na sigurojë edhe numrat në mënyrë që t’i evitojmë zgjedhjet e reja. Kuvendi dhe qeveria nuk i evitojnë zgjedhjet e reja pa e zgjedhur presidentin”, tha Kurti pak para fillimit të seancës konstituive.
Deputeti i LDK-së, Armend Zemaj, ka thënë se nuk do të votojë për kandidatin e LVV-së për kryetar të Kuvendit.
Në një prononcim në hyrje të Kuvendit për vazhdimin e seancës konstituive, ai tha se Kujtim Shala do të jetë kandidati i LDK-së për nënkryetar.
“Do të jetë prapë Kujtim Shala, nuk kemi pasur ndryshim. Nuk do të votojmë pro zgjedhjes së kryetarit të Kuvendit nga Lëvizja Vetëvendosje. Nëse dikush e ka ndryshuar personalisht mendimin, është në vullnetin e tij”, tha Zemaj.
Kuvendi i Kosovës pritet të rifillojë sot procesin e konstituimit, pas më shumë se një muaji bllokadë institucionale. Seanca e vazhdimit është caktuar të mbahet të mërkurën, në orën 11:00.
Dy partitë opozitare, Partia Demokratike e Kosovës (PDK) dhe Lidhja Demokratike e Kosovës (LDK), kanë konfirmuar se deputetët e tyre do të marrin pjesë në vazhdimin e seancës për konstituimin e Kuvendit. Aleanca e Ardian Gjinit ka njoftuar se nuk merr pjesë.
Pas një mbledhje me partinë e tij, kryetari i Partisë Demokratike të Kosovës (PDK), Bedri Hamza, të hënën tha se deputetët e partisë së tij do të marrin pjesë në seancën konstituive në mëngjesin e së nesërmes. Ai tha se partia e tij e konsideron të rëndësishme që Kuvendi i Republikës së Kosovës të jetë i konstituuar para datës 16 shtator, duke e lidhur këtë datë me zhvillimet që pritet të ndodhin në Hagë me ish-krerët e UÇK-së.
“Të gjitha veprimet që ne i ndërmarrim këto ditë ndërlidhen edhe me datën 16 shtator. Ne jemi të bindur se në këtë kohë Kosova ka nevojë që të ketë Kuvend të konstituuar. Ne presim që ata të vijnë në Kosovë. Të festojmë në Kosovë. Nuk ka arsye tjetër”, tha Hamza për media.
Bedri Hamza gjithashtu ka njoftuar se PDK do të propozojë Vlora Çitakun për pozitën e nënkryetares, duke theksuar se kandidatura e Çitakut ishte propozuar edhe brenda afatit të përcaktuar.
Grupin parlamentar të hënën e mblodhi edhe kreu i Lidhjes Demokratike të Kosovës (LDK). Pas mbledhjes, deputetja e kësaj partie, Jehona Lushtaku, ka konfirmuar edhe për pjesëmarrjen e deputetëve të LDK-së në seancën konstituive të nesërmen.
“Vendosëm si grup që të marrim pjesë në seancën konstituive të Kuvendit të Kosovës dhe t’i kontribuojmë konstituimit të Kuvendit, meqë Kosova është në një fazë të rëndësishme për themelimin e institucioneve dhe funksionalitetin e saj”, tha ajo.
Ndërkaq, partia “Aleanca” të martën e ka mbledhur kryesinë e saj. Pas mbledhjes, kryetari i saj, Ardian Gjini, ka njoftuar se deputetët e partisë së tij nuk do të marrin pjesë në seancën konstituive të së nesërmes.
“Dua me ju treguar që sot Aleanca ka konfirmuar vullnetin e shumicës dërrmuese të deputetëve, të anëtarëve të kryesisë që nesër mos me marrë pjesë edhe mos me e legjitimuar shkeljen e vazhdueshme dhe brutale të Kushtetutës së Kosovës nga partia që ka fituar zgjedhjet, e cila ka dalë”, njoftoi Gjini gazetarët.
Më 7 qershor u mbajtën zgjedhjet e parakohshme parlamentare, ndërsa më 8 korrik KQZ-ja i certifikoi rezultatet. Sipas interpretimit të dhënë nga Gjykata Kushtetuese në aktgjykimin e vitit 2025, Kuvendi i Republikës së Kosovës duhej të konstituohej brenda 30 ditëve nga certifikimi i rezultateve.
Afati i fundit për konstituimin e Kuvendit ishte më 7 gusht, ndërsa Albulena Haxhiu, ushtruesja e detyrës së presidentes, e thirri seancën e parë të legjislaturës së re më 6 gusht, në orën 10:00. Megjithatë, si rezultat i moszgjedhjes së kryetarit dhe nënkryetarëve të Kuvendit, procesi i konstituimit dështoi.
Më 8 gusht seanca vazhdoi, ku kryesuesi i seancës ishte Avni Dehari dhe pika kryesore ishte zgjedhja e kryetarit të Kuvendit. Por lideri i Lëvizjes Vetëvendosje (LVV), Albin Kurti, dhe kryeministri në detyrë deklaroi se nuk kishte ende marrëveshje me partitë e tjera dhe kërkoi më shumë kohë për negociata. Më pas, Dehari e ndërpreu seancën dhe nuk caktoi një datë tjetër.
Ndërkaq, më 11 gusht, Dehari deklaroi se seancat nuk kanë kuptim të mbahen përderisa nuk japin rezultate.
Më 13 gusht, deputeti i Partisë Demokratike të Kosovës, Arian Tahiri, së bashku me deputetin e Aleancës, Besnik Tahiri, në një konferencë të përbashkët për shtyp kërkuan që seanca të mbahej më 14 gusht, në orën 11:00, duke argumentuar se vonesa krijonte probleme kushtetuese. Megjithatë, Avni Dehari nuk kishte dhënë përgjigje.
Më 19 gusht, PDK-ja i kishte dërguar sërish letër Avni Deharit, duke kërkuar që seanca të vazhdonte më 20 gusht, në orën 11:00, por seanca përsëri nuk ishte thirrur. Pas kësaj PDK i dërgoi Deharit edhe disa letra ku i kërkonte që të thirrjes seanca.
Tek më 4 shtator, Dehari i VV-së reagoi kur njoftoi se do ta thërras vazhdimin e seancës konstituive për datën 9 shtator.
Ndërkohë që nuk thirrej seanca për konstituimin e Kuvendit, më 31 gusht, Kryetari i Lëvizjes Vetëvendosje, njëherësh edhe kryeministri në detyrë Albin Kurti, dhe kryetari i Lidhjes Demokratike të Kosovës, Lumir Abdixhiku, pas takimeve të shumta që nga 9 korriku, arritën një marrëveshje që ish-diplomati dhe ish-anëtari i Gjykatës Kushtetuese, Bekim Sejdiu, të jetë kandidat i përbashkët për president të Republikës së Kosovës. Por, marrëveshja nuk u pranua nga gjashtë 6 deputetë të LDK-së. /Reporteri.net/.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
