Sot dhe zyrtarisht Federata e Xhudos në Kosovë, ka firmosur marrëveshje me sponsor të ri.

Tashmë kampionët tanë të xhudos në krye me Kampionen Olimpike, Majlinda Kelmendi do të kenë edhe mbështetësin e tyre financiar për çdo ndeshje që e zhvillojnë brenda apo jashtë shtetit, shkruan Reporteri.net.

Kështu, biznesmeni i njohur në Kosovë, Ramiz Kelmendi ka njoftuar se sot së bashku me trajnerin Kuka dhe Majlinda Kelmendin kanë firmosur marrëveshjen e bashkëpunimit për sponsorizim.

Më poshtë shkrimi i plotë i Kelmendit:

“Bazuar në Ligjin për Sponsorizimin e Sportit të Republikës së Kosovës, sot kemi nënshkruar Marrëveshje Sponsorizimi një vjeçare me Federatën e Xhudos së Kosovës!

Në praninë e Selektorit dhe trajnerit me famë botërore Driton Kuka dhe Kampiones absolute botërore të xhudos Majlinda Kelmendi, bashkërisht me Kryetarin e Federatës së Xhudos të Kosovës z.Agron Kuka ne formalizuam edhe zyrtarisht Marrëveshjen me të cilën ‘ELKOS GROUP’ si ‘Sponsor i Artë’ mbështetë sukseset e xhudos kosovare me 180 mijë euro në vit!

Suksese Ambasadorëve tonë të Sportit në rrugëtimin e pandalshëm drejt sukseseve të mëtejme!

Me kënaqësi;
Ramiz Kelmendi – President i ‘Elkos Group-Etc'”.