Në vitin 2004 është themeluar klubi i hendbollit të femrave, Istogu. Afërsisht një vit më vonë nisi ndërtimi i palestrës në Istog. KHF Istogu është rritur shumë për një dekadë e gjysmë jetë, ndërkohë që palestra në qytetin e Istogut nuk është kompletuar ende.

Ka kohë që hendbollistet istogase presin që të luajnë në palestrën e tyre. Dhe pritjes assesi nuk po i vjen fundi. Afatet shtyhen vazhdimisht.

Palestra që ka nisur të ndërtohet rreth 14 vjet më parë nuk është lëshuar ende për shfrytëzim të sportistëve. Nuk ka përfunduar plotësisht ndërtimi i saj dhe saktësisht nuk dihet se kur do të përfundojë. Në të vërtetë, në muajin shkurt ishte premtuar që palestra do të jetë në dispozicion të sportistëve istogas në pjesën e dytë të vitit. Por palestra nuk është kryer ende dhe punë të tjera pritet të bëhen në të gjatë vitit 2020.

KHF Istogu është kampion në fuqi i Kosovës. Po ashtu e ka fituar Kupën e Kosovës këtë vit. Fitoi edhe titullin e kampionit vjeshtor. Skuadra vazhdon që ndeshjet si vendës t’i luajë kryesisht në Pejë. Stërvitjet i zhvillon në sallën e vogël të një shkolle në Istog, shkruan sot “Koha Ditore”.

Suksesi i KHF Istogu kishte bërë presion te përgjegjësit për të premtuar përfundim të shpejtë të palestrës.