Avokati Dastid Pallaska, ka reaguar ndaj atyre që e kritikuan për paraqitjen e tij në një emision televiziv ku komentonte,  siç e cilësoi kryeministri Kurti  “marrëveshjen sekrete” të Presidentit të Kosovës, Hashim Thaçit, për moslejimin e FSK-së në veri të vendit.

Pallaska i ka quajtur fundërrina ata që e kanë kritikuar në rrjetet sociale. Ai ka thënë se të tillët ende nuk e kanë shijuar betejën e vërtetë me njerëzit e lirë të këtij vendi, shkruan Reporteri.net.

Postimi i plotë:

Fundërrinat dalin në sipërfaqe pas vërshimeve.

Mbrëmë duket se kishte një “vërshim” në “drejtorinë e këmishëzinjve virtual” të partisë në pushtet.

Kjo e shpjegon zbrazjen dhe shpërndarjen e pakontrolluar të “fundërrinave” në rrjete sociale mbrëmë vonë dhe sot.

Duket se kanë menduar se – pas diskreditimit të PAN-it – e kanë “çliruar” Kosovën edhe nga opozita.

Sa gabim janë!

Ende nuk e kanë shijuar betejën e vërtetë me njerëzit e lirë të këtij vendi.

Me militantë të verbër nuk debatoj, jo vetëm pse nuk i respektoj.

Është e panevojshme të debatohet me dikë që nuk mendon me kokën e vet.

Nëse këmishëzinjt dëshirojnë debat, i ftoj t’iu kërkojnë shefave të vet politikë që t’i përgjigjen ftesave të mia për debat.

Unë jam këtu dhe këtu do të mbetem, qoftë edhe nëse jam vetëm.

E vërteta nuk i nënshtrohet votës!