Ndërtimi i stadiumit Nacional të Kosovës, pritet të shkaktojë zhurmë mes Qeverisë aktuale Kurti dhe ish-qeverisë Haradinaj.

Kjo pasi, dikush preferon Koreticën e Drenasit e dikush preferon Bërnicën e Prishtinës, varësisht edhe prej përcaktimeve politike që kanë, shkruan Reporteri.

Reporteri.net, sot ka kontaktuar me ministren e Sportit Vlora Dumoshin, e cila tha se ende nuk ka një vendim final për lokacionin e stadiumit.

“Asnjë vendim nuk është marrë, vendimet janë publike, jemi në fazën e programit që do të prezantohet, në ditët në vazhdim do të shohim , çdo vendim do të jetë do të bëhet transparent. Kudo që bëhet stadium është i nevojshëm për Kosovën”, ka deklaruar Dumoshi për Reporteri.net.

Ndërkaq, redaksia jonë ka biseduar edhe me sekretarin e FFK-së, Eroll Salihun, i cili tha se stadiumi është jetik për djelmoshat e Kosovës dhe se pak rëndësi ka se ku përcaktohet lokacioni.

“Ne kemi qenë tek stadiumi edhe me ministren e re të Kulturës Rinisë dhe Sportit, Vlora Dumoshin, atje vetëm i kemi uruar asaj detyrën. Për stadium ende nuk kemi biseduar e kemi lënë të flasim më vonë”, tha sekretari i FFK’së, Eroll Salihu.

“Për ne rëndësi nuk ka fare se ku vendoset lokacioni, pasi Kosova është e vogël, por rëndësi ka që ne si Federatë t’i përmbushim kërkesat e tifozëve që janë shumë të mëdha.

Salihu, shkon tutje, ku thotë se ky stadium duhet të ndërtohet sa më shpejtë, kjo për t’i përmbushur kërkesat e tifozëve që janë në numër të madh.

“Ju e dini vet se sa është interesimi i tyre për ta shikuar Kombëtaren e Kosovës, kështu që ne shpresojmë që puna të ec sa ma mirë dhe ta kemi stadiumin”, përfundoi ai.

Kujtojmë se Kombëtarja e Kosovës, ndeshjet i zhvillon në stadiumin “Fadil Vokrri” që ka një kapacitet prej 13 mijë ulëseve, e që nuk i plotëson kërkesat e “Dardanëve”./Reporteri.net/