Kandidati demokrat për president të Shteteve të Bashkuara, Joe Biden, ka lënë shumë prapa rivalin e tij, Bernie Sanders, në zgjedhjet paraprake në Florida, Illinois dhe Arizona.

Pas raportimeve nga gati të gjitha zonat e Floridës, Biden udhëheq atje me 62% të votave, kundrejt Sandersit me 23%.

Në Illinois, Biden prin me 59%, ndërsa Sanders ka 36%.

Edhe sipas rezultateve të pjesshme nga Arizona, Biden ka një epërsi dyshifrore ndaj Sandersit.

Fitorja në Florida e ka çmimin më të madh, pasi ajo siguron 219 delegatë nga 1,991 sa i duhen një kandidati për të siguruar nominimin nga Partia Demokratike.

Demokratët do ta nominojnë kandidatin e tyre në konventën e partisë që do të mbahet gjatë verës.