Një i vdekur dhe 35 persona të prekur është bilanci i 10 ditëve të para të paraqitjes së koronavirusit në Kosovë.

Dy rastet e fundit që dolën sot pozitive janë raste kontakti njëri me vendbanim nga fshati Petrovë komuna e Shtimes, e gjinisë mashkull me moshë 44 vjeç dhe tjetra me vendbanim në Prishtinë nga komuna e Prishtinës e gjinisë femër e moshës 39 vjeç.

Kështu numri i komunave të prekura me koronavirus në vendin tonë është rritur. Komuna më e re e prekur është Shtimja, çka e çon në 13 numrin e komunave të prekura, shkruan Reporteri.net.

Komuna e Vitisë dhe e Malishevës janë komunat me rastet më të shumta të prekura, me gjithsej nga 7 persona të prekur me koronavirus.

Vendin e tretë janë Prishtina e Gjakova me 4 raste.

Podujeva dhe Gjilani janë me nga 3 raste.

Kurse me veç nga një rast të paraqitur janë 6 komuna: Klina, Lipjani, Prizreni, Obiliqi, Theranda, Ferizaj dhe Shtimja.

Nga koronavirusi deri tani ka humbur jetën veç një person 85 vjeçar nga Dumnica e Podujevës, i cili u varros dje.

Rasti i parë me koronavirus është shënuar më 13 mars në komunën e Vitisë, ku ishte prekur një 77 vjeçar që kishte qëndruar në Itali.

Instituti Kombëtar i Shëndetësisë Publike në vazhdimësi ka bërë thirrje ndaj qytetarëve që të respektojnë masat e rekomanduara nga ta dhe Ministria e Shëndetësisë, pra të qëndrojnë në shtëpi dhe të mos dalin në rrugë pa arsye.

Ndërkohë përkundër rritjes së numrit të personave të prekur, në vendin tonë ende nuk është shpallur gjendja e jashtëzakonshme.

Presidenti i vendit, Hashim Thaçi dhe kryeministri Albin Kurti nuk po pajtohet për shpalljen e gjendjes së jashtëzakonshme. I pari ka kërkuar një gjë të tillë, por i dyti vazhdon të insiston se nuk ka ende nevojë për të marrë një masë të tillë. /Reporteri.net/.