Disa orë pas protestës që opozita e bashkuar zhvilloi mbrëmjen e djeshme, ish-deputetët e Partisë Demokratike janë nisur drejt spitaleve dhe komisariateve për të treguar mbështetje ndaj pjesëmarrësve në tubim që janë arrestuar ose kanë mbetur të plagosur.
Ish-deputeti i Dibrës, Xhemal Gjunkshi ka publikuar në Facebook disa foto nga spitali i Traumës, ku shihet një i ri i lënduar në shtrat, por i prangosur në njërën dorë.
I shoqëruar edhe nga kolegu i tij Bardh Spahia, demokrati tregon se ky veprim është në kundërshtim me ligjin, ndërsa policia tentoi sipas tij t’i pengojë edhe ata vetë të vizitojnë të riun e lënduar.
“Dhunë shtazarake e policisë kundrejt qytetarëve protestues. Janë me dhjetëra rastet e keqtrajtimit dhe dhunimit të qytetarëve të ndaluar. Ne ishim dhe pamë nga afër protestuesit e dhunuar në urgjencën e spitalit të traumës . Policia , e pa aftë për të ndaluar bandat e krimit të organizuar, ne kundërshtim me ligjin, mban të lidhur me pranga qytetarin në kushtet e shtrimit spitalor dhe tenton të na pengojë edhe neve”, shkruan Gjunkshi.