Librari Flora ku në vegjëli shiste Mit’hat Frashëri, dhe dyqani i cigareve ku tregtonte Enver Hoxha është shembur nga bashkia e Tiranës për ti hapur vendin një pallati 25 katësh.

Historianët e konsiderojnë një skandal dhe fshirje të plotë të kujtesës së kryeqytetit. Ndaj kërkojnë ndërhyrjen e menjëhershme për të ruajtur ato pak objekte të mbetura.

Me marrjen e mandatit të parë të kryebashkiakut, Erion Veliaj deklaroi mbështetjen e moratoriumit për ndërtimin e pallateve.

Por nisma nuk pati jetë të gjatë. Gradualisht objektet shumë katëshe nisën të mbijnë në kryeqytet.

Me dhe pa dashje, u zhdukën në qetësi të plotë dhe objekte të veçanta për Tiranën.

Rasti më i rëndë ishte ai i Teatrit Kombëtar, që deri dy ditë më parë konsiderohej atraksion turistik për Bashkinë e Tiranës.

Por së fundi nën zë janë shembur banesa që kanë mbartur jo vetëm traditë por edhe histori.

Dikur në këtë zonë tashmë të rrethuar shiste në vegjëli ish-diktatori Enver Hoxha, e ngjitur me të tregtonte Mit’hat Frashëri.

“Dyqani Flora ka qenë pronë e familjes Bakiu në Tiranë, dikur diktatori ka pas shitur cigare aty. Ishte epiqendra e Tiranës, ka qenë dyqani i luleve, mapo e madhe.”

Tirana nuk është më ajo që ka qenë dikur e madje historiantët shprehen me keqardhje se po shkatërrohet e shkuara.

“Janë rrugë historike, nuk vihet dorë ashtu në rrugët historike.Më vjen keq, ndjej dhimbje të madhe.”

Por në vend që ky vend të shërbente për tërheqjen e turistëve, tashmë është shndërruar në një shesh ku do të ngrihet një objekt 85 metër i lartë me 25 kate.

Lejen për këtë godine e ka marrë kompania “ANA Sh.p.k”.

Ndërsa shumë shpejt Monumentet historike në qendër të kryeqytetit do të zhduken, nën hijen e qiellgërvishtësve.