Futbolli në Shqipëri është rikthyer prej datës tre qershor, por ato që mungojnë janë tifozët të cilët për shkak të koronavirusit duhet të qëndrojnë larg pasionit për të mbështetur klubin e zemrës. Megjithatë, për rikthimin e tyre në impiante ka dhënë shpresë kreu i Federatës Shqiptarë të Futbollit, Armand Duka.

Presidenti në një lidhje telefonike për ABC News, thekson se pjesëmarrja e tifozëve në derbin mes Tiranës dhe Partizanit është e mundshme, për të nisur në këtë mënyrë edhe në ndeshjet e tjera pjesëmarrjen e tifozëve, por gjithsesi Duka shtoi më pas se duhet pyetur kryeministri dhe autoritet shëndetësore.

“Për ne është plotësisht e mundshme që derbi mes Tiranës e Partizanit të luhet me tifozë. Ne jemi dakord, por për këtë duhet të vendosin autoritetet shëndetësore. Duhet të pyesni edhe kryeministrin Rama se çfarë mendimi ka”, u shpreh Duka.

Tashmë, mbetet për t’u parë vendimi që do të merret, megjithatë fakti që në ditët në vazhdim do të hapet transporti publik por edhe përfundimi i gjendjes së emergjencës më datë 23 qershor, i japin shpresë tifozëve. Ndërkohë, kujtojmë se tifozët tashmë janë rikthyer në stadiume në Mal të Zi, Hungari dhe Serbi.