Policia e Kosovës e ka konfirmuar vjedhjen e rëndë që iu bë sot në Lipjan një mërgimtari për të cilën ka raportuar Reporteri.net.

Gazeta merr vesh se mërgimtarit F.R që jeton në Gjermani, hajnat i janë futur në shtëpinë e tij në Lipjan. Siç mësohet, kanë qenë disa persona që përmes dritares kanë hyrë në shtëpi dhe kanë vjedhur një shumë të konsiderueshme parash, arit dhe një ore të shtrenjtë.

Mësohet se hajnat vodhën 9 mijë euro para, ari në vlerë 3 mijë euro, orën Rolex 5 mijë euro, si dhe veturën në vlerë 36500 euro.

Zëdhënësi i Policisë së Kosovës, Bajram Krasniqi e ka konfirmuar vjedhjen.

“Ju njoftojmë se më, 17.07.2020, rreth orës 09:10 ankuesi mashkull ka raportuar se gjatë natës persona të panjohur kanë hapur me forcë dritaren e shtëpisë dhe kanë depërtuar brenda, nga aty kanë vjedhur para te gatshme dhe gjëra tjera me vlerë. Po ashtu të njëjtit i është vjedhur edhe automjeti”, ka konfirmuar Krasniqi.

Sipas tij rasti është duke u hetuar dhe është cilësuar si vjedhje e rëndë.
“Rasti po trajtohet nga hetuesit policorë, për të cilin është njoftuar edhe prokurori dhe është iniciuar rasti ,vjedhje e rëndë’”, ka thënë ai./Reporteri.net