Në sulmin e mbrëmshëm terrorist në Vjenë të Austrisë raportohet të ketë humbur jetën edhe një shqiptar nga Veleshta e Strugës.

Mediet në Maqedoni të Veriut bëjnë të ditur se shqiptari i vrarë është Nexhip Vrenezi, 20-vjeçar – transmeton Reporteri.net.

Lajmin për vrasjen e tij e dha së pari gazetari i njohur nga Maqedonia e Veriut, Nazim Rashidi, i cili ka thënë se sipas informacioneve që i posedon, njëri nga viktimat e mbrëmshme është një i ri shqiptar i Veleshtës, Strugë.

“Nga njoftime të pakonfirmuara deri në fund: Një nga viktimat ne Vjenë është një i ri, nga Veleshta, Strugë”, shkruan Rashidi në profilin e tij ne Facebook.

Me prejardhje shqiptare nga Maqedonia e Veriut është edhe sulmuesi 20 vjeçar, Kujtim Fejzullahi, i cili po ashtu mbeti i vrarë.

Mediat austriake raportojnë se i riu me rrënjë shqiptare ishte simpatizant i organizatës terroriste ISIS.

Deri më tani si pasojë e sulmit të përgjakshëm në Vjenë që dyshohet se ka motive islamike kanë mbetur të vdekur pesë persona, në mesin e tyre edhe vrasësi Kujtim Fejzullahi si dhe janë plagosur 15 të tjerë.

Viktimat e tjera janë dy gra dhe dy burra. Njëra nga gratë thuhet se ishte kameriere, ndërsa gruaja e dytë vdiq nga plagët në spital.