Me vendimin e marrë sot si masë për parandalimin e përhapjes së koronavirusit, sonte nga ora 20.00 deri të hënën në orën 05.00, do të ndalohet veprimtaria e shumë bizneseve, si qendrat tregtare e rekreative, supermarketet, subjektet që ofrojnë shërbimet e gastronomisë dhe të tjera.

Ministria e Shëndetësisë, duke u bazuar në rekomandimet e Institutit Kombëtar të Shëndetësisë Publike dhe Komitetit për Koordinimin dhe Vlerësimin e situatës emergjente nga pandemia e COVID -19, ka propozuar vendimin për ndërmarrjen e masave të mbrojtjes nga pandemia COVID-19 si në vijim:

Do të lejohet veprimtaria e furrave, marketeve të vogla, barnatoreve dhe pompave të derivateve.

“Obligohet Policia e Kosovës të bëjë kontroll rigoroz në zbatim të masave, vendimeve dhe Ligjit për parandalimin dhe luftimin e pandemisë në territorin e Republikës së Kosovës. Për të gjithë shkelësit e këtyre masave, organet kompetente obligohen të shqiptojnë masat ndëshkimore konform Ligjit për parandalimin dhe luftimin e pandemisë covid-19 në territorin e Republikës së Kosovës”, thuhet në vendimin e Qeverisë.

Sot janë raportuar 12 të vdekur në 24 orët e fundit dhe 728 raste pozitive, që është numri më i madh deri më tash.