Ish-sekretari amerikan i shtetit, George Shultz, ka vdekur të shtunën në moshën 100 vjeç.

Shultz njihet për kontributin e tij në dhënien fund të Luftës së Ftohtë, ndërkaq shërbeu në role të ndryshme për tre presidentë amerikanë: Dwight Eisenhower, Richard Nixon dhe Ronald Reagan.

Nën qeverisjen e Reganit ai kaloi shumicën e kohës duke tentuar që t’i përmirësojë marrëdhëniet me Bashkimin Sovjetik.

Pavarësisht se administrata e Reganit njihej për luftën e brendshme, Shultz konsiderohej si një prej figurave më pak antagoniste.

Në pjesën e dytë të të tetëdhjetave ai kishte arritur që ta bindte liderin sovjetik, Mikhail Gorbachev-in, në zbutjen e tensioneve të Luftës së Ftohtë.