Deputetët nga radhët e Partisë Demokratike të Kosovës kanë lëshuar sallën para pak minutave, për shkak të varrimit të babait të ish-kryekuvendarit, Kadri Veseli, Fazli Veseli.

Lajmin e bëri të ditur gjatë seancës deputetja e PDK-së, Blerta Deliu-Kodra.

“Po flas në emër të PDK-së për shkak të varrimit të babait të ish-kryetarit të Kuvendit, zotëri Veseli. Partia Demokratike është e obliguar ta lëshojë sallën meqë do të jemi në varrim në Mitrovicë”, tha ajo në Seancë.

Pas këtij sqarimi, kryesuesja e sallës, deputetja Saranda Bogujevci, i shprehu ngushëllime familjes Veseli.

“Në rregull, ngushëllime për familjen Veseli dhe për juve gjithashtu”, tha Bogujevci, pas sqarimit të deputetes Deliu-Kodra.