“Vështirë është të shkruash për Kosovën, për gjakun që nuk falet. Hallet dhe vuajtjet e popullit shqiptar, përditë e më shumë po shtohen. Kosova po i kalon ditët më të vështira të jetës së saj.

Mendoj: Dritë do të bëhet! Drita do të agojë!”. Këto janë fjalët që Armend Mërlaku i kishte shkruar 15 ditë përpara se të ekzekutohej nga forcat serbe, raporton KTV.

Pavarësisht rrethanave të vështira gjatë 1999-s, 16-vjeçari nga fshati Gremnik i Klinës vazhdonte shkollimin në shtëpi private.

E motra e tij, e cila ishte më e afërta me vëllanë, me lot në sy lexon shkrimet e tij.

Familja Mërlaku, gjatë kohës së luftës, kishte shkuar për strehim në fshatin Pastasellë të Komunës së Rahovecit, ku edhe humbën familjarët e tyre.

Ata janë të zhgënjyer me institucionet, pasi që trupi i Armendit nuk është gjetur ende.

Në masakrën e Pastasellës u vranë e u masakruan 106 persona, nga vende të ndryshme të Kosovës.