Gati për gjysmë ka rënë numri i pacientëve me COVID-19 në spitalet dhe klinikat e Kosovës për një javë. Teksa një javë më herët në spitale e klinika po trajtoheshin 497 pacientë të tillë, në raportin ditor të së mërkurës (sot), janë regjistruar 263 pacientë.

Sipas Shërbimit Spitalor Klinik Universitar të Kosovës, 29 prej pacientëve janë në gjendje të rënduar shëndetësore, në kujdes intensiv mjekësor.

186 prej pacientëve po trajtohen me oksigjenoterapi.

Në Klinikën Infektive janë 57 pacientë, në Mjekësinë Sportive 27, në Pulmologji 29 pacientë (post-COVID), ndërkaq në Mjekimin Intensiv në Klinikën Infektive janë 13 pacientë.

Sa i përket spitaleve rajonale, ai i Pejës është më i ngarkuari me 44 pacientë. Pasojnë ai i Ferizajt me 24 pacientë, i Gjilanit me 19, i Gjakovës me 18, i Prizrenit me 16, i Mitrovicës me 13 dhe i Vushtrrisë që ka vetëm dy pacientë.