Kongresmeni amerikan Eliot Engel, që njihet edhe si miku i madh i shqiptarëve, sot do ta vizitojë qytetin e Gjakovës.

Kongresmeni Engel do të marrë pjesë në ceremoninë e emërtimit të rrugës Ponoshec – Qafë Morinë që do ta mbajë emrin e tij.

Eliot Engel i cili ka ardhur në Kosovë me rastin e hapjes së objektit të ri të Ambasadës të Shteteve të Bashkuara gjatë ditës së djeshme ka vizituar edhe Luginën e Preshevës, shkruan Reporteri.net.

Pas përurimit të rrugës, Engel  do të vendosë kurora me lule te Sheshi “Tom Lantos” derisa me fillim nga ora 16:30 do të ketë edhe një takim me kryetarin e komunës së Gjakovës, Ardian Gjini.

Kujtojmë se Engel para dy ditëve ishte për vizitë edhe në Serbi, ku u takua me presidentin Aleksandër Vuçiq.

Engel njihet si lobist i madh i Kosovës. Vetëm dy muaj më parë me iniciativë të tij në Kongresin Amerikan u rrëfyen krimet serbe gjatë luftës në Kosovë, nga e mbijetuara e dhunës seksuale, Vasfije Krasniqi. /Reporteri.net