Arijanet Muriç synon të jetë mjaft i suksesshëm me Nottingam Forestin sezonin e ardhshëm. Portieri i Kosovës beson se do të ketë më shumë hapësira për të mbrojtur, të cilat nuk i kishte sa duhet tek City.

Përforcimi më i ri i Nottingham Forestit, Arijanet Muriç thotë se synim i tij kryesor për sezonin e ri është të ketë sa më shumë minutazh në portën e klubit anglez.

Portieri i Kombëtares së Kosovës u huazua për një vit tek klubi nga Championshipi për të bërë përvojë pasi tek Manchester City nuk do të mund të mbronte as sezonin e ardhshëm, duke e pasur parasysh se përpara i kishte portierët e klasit botëror si Ederson e Claudio Bravo.

Portieri shqiptar nga Mali i Zi thotë se e njeh mirë ligën e dytë të Anglisë, ndërsa synon po ashtu të jetë i suksesshëm me Nottingamin.

“Unë jam i lumtur që kam ardhur këtu dhe ta kaloj një kohë me bashkëlojtarët e mi të rinj. Shpresoj që do të mund të arrijmë shumë këtë sezon” ka thënë fillimisht 20 vjeçari për uebfaqen zyrtare të klubit.

“Unë e njoh Championshipin mjaft mirë, kam kaluar kohë duke e parë në televizor sezonin e kaluar dhe e di se është një ligë mjaft e vështirë. Jam këtu për të luftuar për pozitën e titullarit në ekip dhe të zhvilloj disa ndeshje këtu”, ka shtuar Muriç.

“Nuk po më pritet për fillimin e sezonit të ri, i cili është afër. Ne duhet të jemi mjaft të përgatitur dhe të jemi ‘fit’ dhe të gatshëm për ndeshjen e parë të sezonit”, përfundoi portieri shtatgjatë.