Bill Gates nuk është më personi i dytë më i pasur në botë. Ai ka rënë për një pozitë pasi ky titull tashmë i takon miliarderit francez Bernard Arnault.

Arnault, i cili është shef ekzekutiv i kompanisë për prodhime luksoze “LVMH”, e zuri vendin e Gates të martën në Indeksin e miliarderëve të Bloomberg, shkruan CNN, transmeton Reporteri.net.

Kjo është hera e parë që kur indeksi është krijuar shtatë vjet më parë që Gates bie nga dy vendet e para. Arnault ka një vlerë neto prej rreth 108 miliardë dollarësh, sipas indeksit, duke shtuar këtu se vetëm vitin e kaluar, pasuria e tij u rrit për 39 miliardë dollarë.

Gates, themeluesi i Microsoft (MSFT) posedon pasuri në vlerë 107 miliardë dollarë.

Në kuadër të korporatës gjigante “LVMH” funksionojnë firmat për prodhimin e gjërave luksoze, si “Luis Vuitton”, “Christian Dior”, Givenchy”, “Dom Perignon” dhe “Sephora”.

Kujtojmë se shefi ekzekutiv i kompanisë “Amazon”, Jeff Bezos mban vendin e parë në listën Bloomberg me një vlerë neto prej 125 miliardë dollarësh. /Reporteri.net