Komisionerja e Këshillit të Evropës për të Drejtat e Njeriut, Dunja Mijatoviq, ka kryer një mision në Kosovë nga data 30 maj deri më 3 qershor të këtij viti.

Misioni i saj u fokusua në çështjet e pazgjidhura që kanë të bëjnë me drejtësinë tranzicionale dhe kohezionin social, lirinë e medias dhe çështjet që lidhen me të drejtat e grave dhe barazinë gjinore, njofton Klan Kosova.

Sot ajo ka publikuar një memorandum ku e ka theksuar rëndësinë që të zbatohet sa më shpejt vendimi i dhënë nga Gjykata Kushtetuese e Kosovës për Manastirin e Deçanit.

“Shumë pengesa për kthimet e qëndrueshme mbeten në fuqi dhe duhet të adresohen, veçanërisht në lidhje me trajtimin e krimeve që minojnë ndjenjën e sigurisë së të kthyerve potencialë dhe pengesat për gëzimin e të drejtave pronësore, pavarësisht përmirësimeve në kuadrin ligjor”.

“Mungesa e vazhdueshme e zbatimit të aktgjykimit të Gjykatës Kushtetuese të Kosovës për Manastirin e Deçanit shtron pyetje të rëndësishme sa i përket respektimit të sundimit të ligjit. Duhet të zbatohet sa më shpejt”, ka theksuar ajo.