Kanë mbetur vetëm edhe dy ditë deri te fillimi i Kupës së Botës, që është turneu më i madh për ekipet kombëtare.

32 ekipe pjesëmarrëse do të luftojnë për trofeun e çmuar të këtij turneu, që këtë vit do të mbahet në Katar.

Klubet e futbollit mund të kenë frikën e lëndimeve të futbollistëve të tyre, megjithatë edhe do të përfitojnë financiarisht. Fjala është për skuadrat që kanë futbollistë pjesëmarrës në Kupën e Botës.

Çdo klub merr para në bazë të numrit të përfaqësuesve që ka në Katar.

Sipas “Marca”, çdo klub merr 10,220 euro në ditë për çdo lojtar që është në Kupën e Botës, pavarësisht nëse ata luajnë ose jo.

Kjo vlen për çdo ditë që futbollistët e klubeve përkatëse janë ende në garë. Kombëtaret mund të luajnë maksimumi deri në 7 ndeshje.

Kësisoj, Bayern Munichi, Barcelona dhe Manchester City, janë klubet që mund të përfitojnë më së shumti financiarisht, pasi kanë më së shumti futbollistë pjesëmarrës në Kupën e Botës “Katar 2022”.

Klubet me më së shumti futbollistë pjesëmarrës në Kupën e Botës

Vendin e parë në listën e klubeve që kontribuojnë me më së shumti futbollistë në këtë turne e mban Bayern Munihu, që ka dërguar 17 futbollistë në Katar.

Pothuajse gjysma e tyre janë të ftuar te Kombëtarja e Gjermanisë, si: Manuel Neuer, Joshua Kimmich, Jamal Musiala, Leon Goretzka, Thomas Muller, Serge Gnabry dhe Leroy Sane.

Katër futbollistët tjerë janë të ftuar te Franca; Dayot Upamecano, Benjamin Pavard, Lucas Hernandez dhe Kingsley Coman.

Bayerni gjithashtu do të përfaqësohet edhe nga Sadio Mane (Senegal), Matthijs de Ligt (Holandë), Josip Stanisic (Kroaci), Eric Maximim Choupu-Moting (Kamerun), Alphonso Davies (Kanada) dhe Noussair Mazraoui (Marok).

Barcelona renditet pastaj në këtë listë me 16 futbollistë. Luis Enrique ftoi 7 futbollistë të kësaj skuadre te Spanja, si: Eric Garcia, Jordi Alba, Sergio Busquets, Pedri, Gavi, Ansu Fati dhe Ferran Torres.

Ousmane Dembele dhe Jules Kounde u ftuan nga Franca, Memphis Depay dhe Frenkie de Jong nga Holanda, Robert Lewandowski nga Polonia, Raphinha nga Brazili, Ronald Araujo nga Uruguai, Marc-Andre Ter Stegen nga Gjermania dhe Andreas Christensen nga Danimarka.

Në Katar do të marrin pjesë edhe 16 futbollistë nga Manchester City gjithashtu, teksa pesë prej tyre janë që do të mbrojnë ngjyrat e Anglisë, si: John Stones, Kyle Walker, Kalvin Philips, Jack Grealish dhe Phil Foden.

Futbollistët tjerë të ftuar nga ekipet e tyre kombëtare janë: Ruben Dias, Joao Cancelo dhe Bernardo Silva (Portugali), Aymeric Laporte dhe Rodri (Spanjë), Kevin De Bruyne (Belgjikë), Ilkay Gundogan (Gjermani), Nathan Ake (Holandë), Julian Alvarez (Argjentinë), Ederson (Brazil), Manuel Akanji (Zvicër).

Pas këtyre tri klubeve, renditet Manchester United me 14 futbollistë, Real Madridi me 13 dhe Chelsea me 12.