Amir Rrahmani nuk arriti t’i luante as 15 minuta mbrëmë në fitoren e Napolit ndaj Bragas me rezultat 2:1.

Qendërmbrojtësi kosovar u detyrua të largohej nga fusha e blertë në minutën e 13-të pasi e pësoi një tërheqje muskulore në kofshën e këmbës së majtë.

Përfaqësuesi kosovar ishte rikthyer në këtë ndeshje të Ligës së Kampionëve pasi kishte munguar në duel me Genoan në Serie A si rezultat i një tërheqjeje të lehtë muskulore në ndeshjen e Kosovës me Rumaninë në kualifikimet për Euro 2024.

E tash, mediat italiane raportojnë se në ditët në vazhdim do t’i bëhen ekzaminime të detajuara futbollistit kosovar, ndërsa do të dihet edhe kohëzgjatja e mungesës së tij.

Lëndimet e tilla zakonisht i kërkojnë dy deri në tri javë pushim të muskulit, prandaj kapiten Rrahmani me gjasë do të mungojë në ndeshjet e Kosovës në muajin tetor.

Është e vështirë të besohet se ish-futbollisti i Dinamo Zagrebit e Veronës do të rrezikojë për t’u paraqitur me “Dardanët”, kur dihet se këta të fundit i kanë humbur gjasat për kualifikim në Kampionat Evropian, prandaj më i logjikshëm duket se do të jetë opsioni i pushimit të tij, në mënyrë që të jetë gati për angazhimet me Napolin pas ndeshjeve të Kombëtareve.