Ministri i Administrimit dhe Pushtetit Lokal, Elbert Kransiqi ka dalë kundër planeve të kryeministrit Albin Kurti për dhënien e tokës për Manastirin e Deçanit.

Ai ka deklaruar se “s’ka hapësirë për vendimet të cilat burojnë nga periudha e Millosheviqit”.

“Nuk ka hapësirë për vendimet të cilat burojnë nga periudha e Millosheviqit”, ka deklaruar ai për Klan Kosova.

Të mërkurën, gazeta online Reporteri.net, duke u thirrur  nga burime të besueshme brenda procesit, ka raportuar  se Qeveria e Kosovës, ka nisur komunikim me Komunën e Deçanit që drejtohet nga partia opozitare AAK, për ta bindur kryetarin Bashkim Ramosaj që të respektojë vendimin e Gjykatës Kushtetuese, sikurse ekzekutivi kosovar po punon edhe në drejtimin e mënjanimit të pengesave që mund t’i paraqesë Agjencia Kadastrale e Kosovës karshi implementimit të aktgjykimit të vitit 2016 që njeh Manastirin e Deçanit si pronarin legjitim të tokave në fjalë.

Rregullimi përfundimtar i pronësisë së tokave të Manastirit të Deçanit, përmes respektimit të vendimit të Gjykatës Kushtetuese, si “kusht” për anëtarësimin e Kosovës në KiE ishte përmendur para rreth një muaji nga ambasadori gjerman në Kosovë, Jorn Rohde, i cili shprehimisht në një intervistë pati thënë se nuk sheh që kandidatura e Kosovës për anëtarësim në Këshillin e Evropës “do të zbatohet me sukses nëse kjo çështje nuk zgjidhet”.