Shërbimi Korrektues i Kosovës ka shpallur tender në vlerë prej 2 mijë e 380 euro për korrjen e grurit në hapësirat e institucioneve korrektuese.

Sipas njoftimit për kontratë të publikuar në faqen zyrtare të Komisionit Rregullativ të Prokurimit Publik, kompania që fiton tenderin do të bëjë korrjen e grurit tek Qendra Korrektuese në Dubravë, Smrekonicë dhe Qendrën Korrektuese në Lipjan, shkruan Gazeta Online Reporteri.net.

Në total sipërfaqja me grurë që do të korret është 13.20 hektarë. Korrja e grurit duhet të bëhet 10 ditë nga dita e dhënies së kontratës.

Përveç korrjes, kompania që fiton tenderin duhet të bëjë edhe bartjen e grurit deri te kompania e deponimit të miellit.

“Operatori ekonomik fitues është i obliguar që perpos korrjes së grurit ta bëj edhe ngarkimin e grurit, bartjen deri te kompania e deponimit te miellit e përcaktuar nga Qendrat Korrektuese në Dubravë dhe Lipjan”, thuhet në njoftim.

Kompanitë e interesuara për këtë tender, mund të dorëzojnë ofertat e tyre deri më 12 korrik, kur edhe do të bëhet hapja e tenderëve.