Ministria e Punëve të Brendshme po planifikon të angazhojë një ekspert për trajtimin psiko-social të viktimave të trafikimit me njerëz. Vlera e parashikuar e kontrates është 80 mijë euro, shkruan Gazeta Online Reporteri.net.

Eksperti do të angazhohet në Qendrën për Strehim, Mbrojtjen dhe Rehabilitimin e Viktimave të Trafikimit me Qenie Njerëzore. Kohëzgjatja e kontratës publike kornizë është 36 muaj.

“Angazhimi nuk nënkupton themelim i marrëdhënies së punës. Kontraktuesi paguhet-kompensohet vetëm për orë që angazhohet”, sqarohet në njoftimin për kontratë.

Eksperti që angazhohet do të bëjë vlerësime Piskologjike/psiko-sociale, psikoterapi individuale, psikoterapi grupore si dhe do të përfaqësojë rastet e trajtuara në gjykatë.

Takimi për hapjen e tenderëve do të bëhet më 29 korrik, në orën 14:00.

“Në bazë të aplikacioneve të pranuara, më së shumti 6 kandidat do të ftohen për të dorëzuar tenderët e detajuar të kësaj kontrate. Nëse më shumë se 6 kandidat të përshtatshëm i plotësojnë kriteret e mësipërme të përzgjedhjes, përparësitë dhe dobësitë relevante të aplikacioneve të këtyre kandidatëve do të riekzaminohen për të identifikuar gjashtë aplikacionet më të mira për proceduren e tenderit”, thuhet në njoftim.