Një person është dërguar me urgjencë në spital si pasojë e lëndimeve që mori pasi dy të dyshuar kanë shtënë me armë zjarri në drejtim të tij mbrëmë pak para mesnatës në Mitrovicë, raporton Gazeta Online Reporteri.net.

Rastin e ka konfirmuar Policia e Kosovës përmes raportit 24 orësh, ku bëhet e ditur se të dyshuarit janë larguar nga vendi i ngjarjes, teksa lëndime ka marrë edhe një grua e cila po ashtu u dërgua në spital për tretman mjekësor.

“Viktima mashkull kosovar ka pësuar lëndime pasi që dyshohet se dy të dyshuar kosovarë për shkak të një mosmarrëveshje të mëhershme, kanë shtënë me armë zjarri në drejtim të viktimës dhe pastaj të dyshuarit me veturë janë larguar në drejtim të panjohur. Lidhur me rastin viktima është dërguar për tretman mjekësor dhe sipas mjekëve kompetent gjendja e tij është stabile, ndërsa lëndime të lehta ka pësuar edhe viktima femër të cilës po ashtu i është ofruar tretman mjekësor”, thuhet në njoftim.

Me urdhër të prokurorit, rasti është cilësuar ‘Vrasje në tentativë’, ndërsa veprimet tjera ligjore do merren posa të kapen të dyshuarit.