Dënohet me burg ish-kryeministri i Maqedonisë së Veriut, Nikola Gruevski

Ish-kryeministri i Maqedonisë së Veriut, Nikolla Gruevski është dënuar në mungesë me një vit e gjashtë muaj burg për porositje të dhunës në komunën Qendër në vitin 2013.


Po ashtu, me një vit burg me kusht u dënua edhe ish-bashkëpunëtori i tij Mile Janakieski, por me kusht që në 4 vitet e ardhshme të mos kryejë vepër të tillë.

Sipas akuzës, ish-kryeministri Nikola Gruevski e kishte porositur Mile Janakieskin që të organizojë sulm ndaj ish-këshilltarëve të opozitës së atëhershme LSDM, duke e përcjellë në opinionin sulmin si protestë qytetare nga revolta për vendimin për prishjen e një kishe në Qendër, edhe pse një pikë të tillë në rendin e ditës gjatë mbledhjes së këshillit nuk ekzistonte.

Ish-kryeministri Nikola Gruevski u arratis nga Maqedonia e Veriut në drejtim të Hungarisë, vend në të cilin kërkoi azil politik me pretendimin se i rrezikohej jeta.