Macroni mbledh Këshillin e Mbrojtjes, shkak dyshimet për spiunim nga Maroku

Emmanuel Macron - Projekti Pegasus - Reporteri

Presidenti i Francës, Emmanuel Macron, të enjten në mëngjes do të mbajë një takim të veçantë me kabinetin në Pallatin Elysee për të diskutuar rreth rastit të spiunimit me softuerin Pegasus.


Lajmin për grumbullimin e qeverisë franceze në takim e bëri të ditur zëdhënësi i saj, Gabriel Attal, shkruan Reuters.

“Presidenti këtë mëngjes do të mbajë një takim special të Këshillit të Mbrojtjes në Elysee për rastin Pegasus dhe për sigurinë kibernetike”, tha Attal për Radion France Inter.

Gazeta franceze, “Le Monde”, raportoi se shërbimet marokene të inteligjencës kishin identifikuar një telefon që Macroni ishte duke e përdorur nga viti 2017.

Sidoqoftë, Maroku ka mohuar se është klient i zhvilluesit izraelit të softuerit Pegasus.

Në anën tjetër, presidenca franceze tha se nëse këto zbulime janë të vërteta, ato do të ishin shumë serioze.

Softueri Pegasus, i zhvilluar nga një kompani izraelite, futet në telefona dhe ua mundëson operatorëve që t’i spiunojnë ata që i bëjnë cak.

Udhëheqësit politikë janë në listën e rreth 50.000 numrave të telefonit që besohet se ishin me interes për klientët e kompanisë izraelite, NSO Group.