Mjekët në Japoni gjetën një rrëmojëse në zorrën e trashë të një burri pasi ai aksidentalisht e kishte gëlltitur objektin e drunjtë dy muaj më parë, duke pësuar dhimbje për javë të tëra.

Rasti i pazakontë mjekësor u raportua në revistën mjekësore “British Medical Journal”, ku u dhanë hollësi se si burri 67 vjeç shkoi te mjeku pasi vuajti nga dhimbjet në trup për dy muaj, shkruan Daily Mail.

Sipas kontrollit fillestar, mjekët menduan se burimi i dhimbjes është stenoza rreth pjesës së poshtme të shpinës.

Ndonëse stenoza mund të trajtohet edhe me ilaçe dhe terapi fizikale, mjekët në Japoni vendosën që ndërhyrja kirurgjike është zgjidhja më e mirë në këtë rast.

Sidoqoftë, ata u befasuan kur nga një skenim që bënë pak para se ta fillonin operacionin panë një rrëmojëse 7.6 centimetra të gjatë në zorrën e trashë të pacientit.

Gjashtë ditë pasi mjekët zbuluan se çka kishte në zorrën e trashë, burri iu nënshtrua operacionit dhe dhimbja iu largua. “Dhimbja më pas u zhduk dhe simptomat nuk janë shfaqur më”, thuhet në raportin e revistës mjekësore.