“Njerëzit frikësohen nga fytyra ime, por Allahu më ka krijuar kështu”, 23-vjeçja rrëfen jetën e saj të vështirë me sëmundjen

Jeta e Khadija Kahtoon është e vështirë. Kjo pasi 23-vjeçarja ka lindur me një tumor, i cili gjatë viteve ia mbuloi tërë fytyrën. Tashmë, ajo duket se është pajtuar me fatin e saj, për të jetuar me fytyrën e veçantë, që nuk ngjason aspak me njerëzit e tjerë.


“Kur njerëzit janë të frikësuar, zakonisht i pyes pse. Unë ju them se Allahu më ka krijuar kështu, dhe unë jam njeri ashtu si ata. Por, përkundër kësaj, ata janë ende të frikësuar. Sidomos fëmijët vendas”, kështu e fillon rrëfimin për jetën e saj 23-vjeçarja nga Kolkata, kryeqyteti i Nebgalit Perëndimor të Indisë.

Khadija thotë se tashmë kjo është bërë mënyra e jetesës së saj dhe nuk i prish punë të jetojë kështu.

“Është pak e vështirë, por nuk e kam problem. Tumori ishte i vogël kur u linda, por më mbulloi fytyrën kur u rrita. Pesha e tumorit tim është 600 gramë tani. Mendoj se është bërë një mënyrë jetese për mua. Unë dua të jetoj në këtë mënyrë”, ka deklaruar ajo.

Babai i saj ka treguar për gjendjen e të bijës nga fëmijëria e deri më tani.

Ai ka rrëfyer edhe për dërgimin e saj në spital dhe shuarjes së shpresave nga mjekët, pasi i thanë se ajo mund të vdesë nëse operohet.

“Kur ajo ishte e vogël, vumë re diçka nuk ishte normale. Kur ajo ishte rreth tre deri në gjashtë muaj, njerëzit përreth nesh sugjeruan që ta dërgonim për ta kontrolluar në spital. Ata na thanë se asgjë nuk mund të bëhej. Se ekzistonte rreziku që ajo të vdiste nëse do të provonim një operacion. Kështu që ne e pranuam fatin e saj dhe mendojmë se ajo do të duhet të qëndrojë kështu. Ne shqetësohemi nëse bëjmë ndonjë gjë, kjo thjesht do të shkaktojë probleme për të ose ajo mund të vdesë”, ka deklaruar babai i saj, transmeton Express.

Vëllai i saj thotë se ka njerëz që i ndihmojnë familjes, por shumë të tjerë vetëm e fotografijnë Khadijen.

“Sa herë që dalim me të, disa nga banorët e zonës vijnë dhe e fotografojnë, dhe ka disa që na ndihmojnë, duke na dhënë para ose çfarë munden. Mendoj se disa njerëz e kuptojnë se ne vërtet kemi nevojë për ndihmë dhe ata përpiqen të na ndihmojnë. Por ka disa që thjesht bëjnë fotografitë dhe kaq”, ka thënë ai.

Ndërkaq nëna e 23-vjeçares thotë se është e lumtur se si vajza e saj e lufton sfidën që ka.

“Jam shumë krenare për mënyrën se si vajza ime përballet me sfidën që i është dhënë”, deklaron nëna e Khadijes.

Babai i Khadijes thotë se nuk mund ta detyrojë atë të operohet, pasi tani ajo është e rritur dhe mund të vendosë për jetën e saj.

“Ajo e ndjen se është mirë ashtu siç është. Tani ajo është rritur, unë nuk mund të detyroj asnjë trajtim ndaj saj, nëse ajo nuk e dëshiron atë. E tëra që dua është që ajo të jetë e lumtur. Nuk ka askush si ajo. Ajo është e vetmja në të gjithë këtë univers. Kjo është ajo që u them njerëzve”, deklaron babai i saj.

Mjekët besojnë se Khadija Kahtoon ka sëmundjen e Neurofibromatozës, që ndryshe njihet si një çrregullim gjenetik i sistemit nervor. Kryesisht ndikon në mënyrën se si formohen dhe rriten qelizat nervore. Ajo bën që tumoret të rriten në nerva. Neurofibromatoza mund të trashëgohet nga prindërit ose mund të ndodhë për shkak të një mutacioni (ndryshimi) në gjene.