Presidentja Vjosa Osmani ka pritur sot në takim ambasadorin jorezident të Kanadasë në Kosovë, Alan Bowman, me të cilin ka diskutuar për mundësitë e thellimit të bashkëpunimit ndërshtetëror, në veçanti pas takimeve me udhëheqjen e Kanadasë muajin e kaluar.

Osmani theksoi se mbështetja për njohje të reja dhe anëtarësime në organizata ndërkombëtare është tregues i angazhimit më të madh të Kanadasë për sigurinë dhe paqen e rajonit.

Ajo shprehu gatishmërinë për të intensifikuar raportet e Kosovës me Kanadanë në fushën e diplomacisë, shkëmbimeve tregtare dhe bashkëpunimit në çështje të sigurisë dhe mbrojtjes.

Ndërsa, ambasadori Bowman i ka shprehur presidentes Osmani falënderimin e Kanadasë për ndihmën që Kosova ka dhënë në strehimin e refugjatëve afganë.

Në këtë drejtim, Osmani tha se qytetarët e vendi tonë, nga përvoja e tyre si refugjatë gjatë luftës së fundit, e çmojnë rëndësinë e strehimit të sigurt, dhe se institucionet e Kosovës do të jenë përkrah aleateve të saj të NATO-s në ballafaqimin e sfidave të tilla humanitare.