Lidhja Demokratike (LDK) ka afër finalizimin e programit qeverisës me subjekte politike, me të cilat synon ta ndërtojë qeverinë e re. Fokusi në të është vënë tek rimëkëmbja ekonomike pas pasojave të pandemisë.

Arban Abrashi, anëtar i Kryesisë së LDK-së, i cili është pjesë e grupit që ka negociuar koalicionin e ri, i ka thënë gazetës se takimet e rregullta me partnerët e koalicionit janë duke u zhvilluar lidhur me përgatitjen e programit. Sipas tij, zbatimi i dokumentit do të fillojë që nga dita e parë e punës së qeverisë së re, raporton KOHA.

“Në përgjithësi, fokusi i subjekteve politike është tek menaxhimi i pandemisë, si dhe te Programi i rimëkëmbjes ekonomike, natyrisht pa lënë anash edhe aspektet e tjera të sektorëve të ndryshëm, dhe tani për tani mund të themi se jemi në rrugë të mirë dhe se programi është përafruar në tërësi”, ka thënë Abrashi. “Programi i qeverisë Hoti është program i zhvillimit ekonomik, ku përfshihen menaxhimi i pandemisë dhe mëkëmbja pas pandemisë, për të kaluar më pas tek përmirësimi i mirëqenies së qytetarëve në përgjithësi”.

Që nga fillimi i muajit, kandidati i këtij subjekti politik për kryeministër, Avdullah Hoti, ka takuar përfaqësuesit e Aleancës për Ardhmërinë e Kosovës (AAK) dhe ata të Nismës Socialdemokrate, me qëllimin për ta harmonizuar programin qeverisës, ani se me to e ka firmosur më herët marrëveshjen e koalicionit. Takimet janë zhvilluar edhe pasi Gjykata Kushtetuese e ka pezulluar dekretin e presidentit Hashim Thaçi për ta caktuar Hotin si mandatar për formimin e qeverisë së re.

Lëvizja Vetëvendosje (LVV), parti e cila ka dalë e para në zgjedhje, e ka kontestuar në Kushtetuese dekretin, pasi ajo konsideron se pas mocionit të iniciuar nga LDK-ja që për prodhim pati rrëzimin e Qeverisë, vendi duhet të shkojë në zgjedhje.