Autor: Mirlind Behluli

Nesër Kosovën do ta vizitojë Presidenti i Sllovenisë, Borut Pohar, ku pritet të takohet me Presidenten e Kosovës, Vjosa Osmani. Këtë gjë e ka konfirmuar më herët gjatë ditës Presidenca e Kosovës.

Këshilltari i Presidentes Osmani, Bekim Kupina, i tha Gazetës Reporteri.net se shefja e shtetit do ta ketë një takim me me presidentin slloven.

“Mundem me ta konfirmu që vjen nesër. Po [Presidentja Osmani do të takohet]”, tha Kupina për Reporteri.net.

Të njëjtën gjë e ka konfirmuar edhe Ambasada e Sllovenisë në Prishtinë për Reporteri.net duke treguar se një takim i tillë do të mbahet si rrugë për përgatitjen e samitit të Brdo-Brijunit.

“Presidenti Pahor do të takohet me homologen e tij Osmani në përgatitje për Samitin e 17 majit të Procesit të Brdo-Brijuni”, thuhet në përgjigjen e Ambasadës Sllovene në Prishtinë për Reporteri.net.

Pahor nuk do të takohet me Kryeministrin e Kosovës, Albin Kurtin.

Kujtojmë që kohë më parë mediat sllovene kanë publikuar një “non-paper” i cili aludohet të jetë shkruar nga kryeministri i Sllovenisë, Janez Jansha, e në të cilin flitej për rikonfigurimin e kufijve në Ballkan përfshirë ndryshimet e kufirit të Kosovës e Bosnjës.

Por, këto raportime të mediave i pati mohuar Presidenti i Sllovenisë, Pohar.

Javën që shkoi Pohar ka qëndruar për vizitë zyrtare në Shqipëri ku u takua me krerët e shtetit shqiptar.